Nongstoiñ, Nailur, 25: Ka ophis jong ka District Medical & Health Officer (DM&HO), West Khasi Hills District, Nongstoiñ ryngkat ka jingïatreilang bad ka District Animal Husbandry & Veterinary Department ka la pynlong ïa ka, ‘Rabies Awareness Programme’ ha ka 25 tarik u Nailur 2025 ha St. Peter’s Higher Secondary School, Pyndengrei.
La sdang ïa ka prokram da ka jingïashim bynta jong ki khynnah skul na kylleng ka district ha ki jingïakop thoh dur (Drawing), Poster bad Elocution naduh ka por 10 baje mynstep haduh ka por 1 baje noh phai sngi. Ka phang pdeng jong baroh kine ki jingïakop ki long halor ka mat kaba ïadei bad ki jingtip jong ki samla shaphang kane ka jingpang kaba shyrkhei, ban pynphriang ïa ka jingïohi bad jingsngewthuh kaba shai halor ka jingma jong ka jingpang rabies.
U Dr. R. Marweiñ District Nodal Officer NRCP, u la ai ïa ka jingkren kaba bnïah bad pynshai bha shaphang kane ka jingpang. La ïoh ïa ka jingkren bniah halor ka jingpang rabies na ka Dr. L. Myliemumlong, ophisar na ka District Animal Husbandry & Veterinary Department, kaba la kdew ba ka rabies ka long ka jingpang kaba lah ban ïada, hynrei kam don dawai satia ïa kane ka jingpang lada ka la paw ki dak, kumta ka jingtip bad ka tika ha ka por kaba biang ka long kaba donkam eh.
U Kongsan bah C.P. Mawkon, Additional Deputy Commissioner, West Khasi Hills District, u la plie paidbah ïa ka video jingtip lyngba ka YouTube kaba ai jingtip halor ka rabies. Ha ka jingkren jong u, u la ong, “Ka jingshah dait mrad la ka dei ha ki ksew, miaw bad kiwei kiwei ki mrad ym dei satia ban kheiñ sting, namar kham bunsien kane ka jingpang lada ym sumar ka lam beit sha ka jingïap hynrei lah ban ïada ïa ka. Ka jingïada kham kloi bad ka tika, ka lah ban pynim ïa ka jingim”.
U la kyntu ruh ïa ki khynnah skul ba kin shim ka bynta ba kongsan eh ban pynsaphriang ïa ka jingtip bad ka khubor kaba shai sha baroh, khnang ba kane ka jingmyntoi bad jingtip kaba ki ïoh na kane ka prokram kan pur sha ki longïing longsem bad sha ka imlang sahlang.
La pynkut ïa kane ka prokram da ka jingai khublei bad jingai khusnam sha ki nongjop ha ki jingïakop thoh Dur (Drawing Competition), kata sha ka St. Francis D. Assistant Higher Secondary School, Poster Competition sha ka Sibsingh Memorial Higher Secondary School bad Elocution sha ka St. Peter’s Higher Secondary School.
Ka long kaba sngewkhia ruh ba naduh u snem 2024 haduh mynta, ka District ka la shem ba don palat 6 ngut kiba la ïap na ka daw jong ka jingpang rabies, kaba pynpaw ba dang donkam shuh shuh ban bteng ïa ka jingpynshai paidbah bad ka jingpyrkhat halor ka koit ka khiah paidbah.
