Shillong, Nailur 25: Ka Shillong Premier League 2025 ka la sakhi ïa ka jingïakhun kaba itynnat bad kaba pynkhihwin bha hapdeng ka Laitkor bad ka Rangdajied United hynne ka sngi Palei ha madan First Ground-SSA Stadium, Polo, ha kaba baroh arliang ki la hap ban hun ïa ka shi point naba ïakhaid mar 2-2 kol.
Baroh arliang ki la ïoh ïa la ka jong ka bynta ban lamkhmat ïa ka jingïalehkai, ha kaba u Menangpyndap Khongjee (25’) u la pynkhihjar nyngkong na ka bynta ka Rangdajied hynrei ka Laitkor ka la wanphai lyngba ki kol na u Fridison Wanniang (45’+2) bad u Giovanni Syiemiong (61’). Nangta u Denelson Pyngrope ka Rangdajied u la pynïakhaid noh ha ka minit kaba 84.
Ka Laitkor kaba shong ha ka kyrdan ba san ka la neh ha kajuh ka jaka ba ka don namar kane ka jingïakhaid bad mynta ka la ïoh 8 poiñ bad ka la sahdien ïa ka Langsning tang ha ka jingïapher kol (+9 la +1). Katba kaba donkam shisha ïa ka point ha kane ka jingïakhun dei ka Rangdajied namar ba ka dang hap ha ka thup kyrdan kaba ap jingma (relegation zone) shuwa ban sdang ka jingïalehkai. Watla ka RUFC ka kham kwah pura ïa ki point, hynrei ka jingïapher kaba tang shi point ka la kyntiew ïa ka RUFC (jingïapher kol da -4) sha ka kyrdan kaba hynriew, da kaba ïaryngkat da 6 point bad ka Malki (-10) bad ka Sawmer (-11) hynrei ka don ïa ka jingïapher kol kaba kham bha. Hynrei ka Rangdajied ka la ïalehkai kham bun sien ban ïa kine kiwei pat ki ar tylli ki klob bad ka sah satang khyndiat por ban ïaleh ban kyntiew ïalade ha kane ka SPL 2025.
U Menangpyndap u la pynkhihwin da kaba thep ïa ka kol ha ka minit kaba 25, ïa kaba u la shut da ka kjat kadiang na tduh ka phyllaw kol jong ka liang pyrshah. Ka Laitkor ka la ïohlad ban pynïakhaid ha ki minit pynjlan ba khatduh jong ka kylla step ha ka por ba u Fridison, uba la mih madan kum u nongïalehkai ba bujli ïa u Freelyson Tariang, u la ïohpdiang ïa ka bol shuwa ban thep lyngba u rangap kol jong ka RUFC u Kerichard L Marshillong.
Tang hadien ba la kynjoh shi kynta, u Giovanni u la thep ïa ka kol kaba ar ban buh hakhmat ïa ka Laitkor, kaba dang wad ïa ka jingjop kaba lai ha kane ka samoi. Hynrei u Denelson u la pynthikna ba kane kan nym jia da kaba kynthih kham shalor ban ïa kiwei pat ki rangïalehkai khnang ban ïoh pyndei tiak da ka khlieh ïa ka bol ba la pashat na ka corner kick khyndiat minit shuwa ba u referee un put pynwai ïa ka jingïakhun.
Ka Rangdajied kan sngewsih bad babe ïa ki katto katne ki kabu ba ka la pynsyrwa ban knieh ïa ka jingjop na ka Laitkor, ïa kaba ki lah ban pynthikna ruh naduh ka kylla step. Lah ban kdew ba ka RUFC ka la long kaba kham khlaiñ bad kaba kut jingmut bha ha kane ka jingïakhun, khamtam ha ka jingleit ban tur shakhmat; Ka RUFC ka la thep tang ar kol ha ki san tylli ki jingialehkai ba la dep hynrei ha kane ka jingïakhun ka la long kaba kham pher.
Watla ka RUFC ka la long ka kynhun kaba kham khlaiñ ha kane ka jingïalehkai hynrei ka la hap pat ban durut tyngeh tang ban pynthikna ïa ka shi point ha kane ka samoi 2025 jong ka SPL, kaba lah ban long ka samoi kaba sniew tam jong ka klob.
Kawei pat ka jingïakhun kaba kongsan kan long ha kane ka sngi Thohdieng, ha kaba ka Sawmer kan aireng pyrshah ïa ka Mylliem ha ka por 3:30 baje janmiet. Kine ki arliang mamla ki don ha ka kyrdan kaba phra bad kaba khyndai marïabud ha ka miej ïakheiñ poiñ bad ki donkam ban kiew kham sha jrong ha kane ka samoi jong ka SPL kaba jur bha ka jingïakhun.
