SHILLONG, Nailur 25: Ka Meghalaya Arm Wrestling Association (MAWA) ka la pynbna ba kan sa pynlong ïa ka Meghalaya State Open Arm Wrestling 2025 ryngkat ka jingthmu ban wad ïa ki Rang bad ki thei ïakhun kti kiba khlaiñ bad ruh ha kajuh ka por ban pynkhreh ïa ki na ka bynta ka 39th National Games 2027 ka ban sa long ha jylla Meghalaya.
Kane ka lympung kan ïaid hynriew sngi lynter bad yn sdang ïa ka naduh ka 29 tarik Nailur, 2025 (Lah sngi U Blei) bad kan kut haduh ka 04 tarik Risaw, 2025 (sngi Saitjaiñ) bad jaka kan long ha Shillong College .
Ïa kane ka jingïakop la pynlong da ka jingïatreilang bad ka tnad Sports jong ka Sorkar Jylla, ka Sports Development Cell, Shillong College, ka Meghalaya AIDS Control Society (MACS), kaba la pynïaid da ka Treilang Welfare Society, ryngkat ka jingkyrshan jong ki bor pahara na ka Bouncer Association of Meghalaya.
Ki jingïakop kin long ha ki kyrdan bapher bapher na ka bynta baroh shynrang bad kynthei katkum ka jingkhia jong ki, ha kaba ka sngi ban thew ïa ka jingkhia kan long ha ka 27 tarik Nailur, 2025 ha Shillong College.
Ki jingïakop kin long na ka bynta ka Inter School/College (Right Hand 29 tarik Nailur; Left Hand 30 tarik Nailur), Inter Gym (01 tarik Risaw–Both Hands); Inter Government Departments (02 tarik Risaw–Both Hands); Inter District (03 tarik Risaw–Right Hand, 04 tarik Risaw-Left Hand).
La pyntip ruh ba tang ïa ki nongshong shnong jong ka Jylla Meghalaya ki lah ban shim bynta ha kane ka lympung, bad ki donkam ban rah ryngkat ki kot ki sla ban pynshisha, kum ka EPIC/Aadhaar/Ka ID ophis, ka ID skul ne college, lane ka syrnod kha.
Ha ryngkat kane ka jingïalehkai, yn pynlong ruh ïa ka prokram pynsngewthuh shaphang ka jingpang HIV/AIDS da ka MACS, ha kaba ka jingthmu jong kane ka prokram ka long ban hikai bad pyntip sha ki paidbah shaphang une u khniang jingpang, ka jingsaphriang jong u, ka jingïada, bad ka jingsumar.
