Hapoh 7 sngi phah kynriah ka High Court ïa ki nongtrei kiba ïakhih ha phyllaw ka GHADC

Shillong, Nailur, 24: Ka Ïingbishar Meghalaya High Court ka la bthah ïa u Superintendent of Police (SP) jong ka West Garo Hills District ban kyrpad ïa ki nongtrei kiba ïakhih ba kin kynriah noh na ka phyllaw jong ka GHADC hapoh hynñiew sngi bad ban ym wanrah kano kano ka jingkhanglad ïa ki nongtrei kiba don ka mon ban leit trei.
Ïa kane ka jingbthah la pynmih hadien ba la bishar ïa ka Public Interest Litigation PIL ba la mudui da u Tokyo R. Marak kaba kyrpad ïa ka ïingbishar ban tuklar lem hadien kaba la mih na ka jingïakhih kaba dang ïaid shakhmat jong ki nongtrei ha Garo Hills Autonomous District Council (GHADC).
Ka jingïakhih kaba la sdang naduh ka 29 tarik, Naitung, 2025, ka la pynthut ïa ki jingtreikam jong ka GHADC, kaba la ktah lut ïa ki paidbah. Ki nongtrei ki la ïakhih ban dawa ïa ka Council ban siew ïa ka tulop kaba dang sahteng jin 43 bnai bad kiwei kiwei ki mat.
La bthah ruh ïa u nongmudui ba un phah ïa ka jingpyntip sha u President ne Secretary jong ka Non-Gazetted Employees Association (NGEA) lyngba u SP.
“Ha kane ka jinglong jingman, namarkata, katba dang ap ïa ka jingmih jong u nongshah mudui No.5, kane ka Ïingbishar ka kdew ba khnang ban pynbha ïa ka jinglong jingman mynta, ka long kaba donkam ba dei ban pynmih katto katne ki hukum ba shipor mynta ka kynti. Katkum kane, la bthah ba u Superintendent of Police, West Garo Hills, Tura ba un shimkhia hapoh hynñiew sngi ban pyntip sha u nongshah mudui No.5, President jong ka Association halor ka jingsahteng jong ka PIL bad nangta ban kyrpad ïa ki nongtrei kiba ïakhih ba kin kynriah hi noh da lade na ka khyrdop rung sha ka phyllaw jong ka GHADC bad ym ban pynwit ïa kiba don ka mon ban leit trei,” la ong ka Division Bench kaba kynthup ïa u Acting Chief Justice HS Thangkhiew bad u Justice B. Bhattacharjee ha ka hukum ba la pynmih ha ka sngi Balang.
“La khmih lynti ba u nongshah mudui No.5 , un kohnguh ïa kane ka jingkyrpad ban leh da u Superintendent of Police bad ban ym pynthut ïa ka kam jong ka GHADC, hynrei lym kumta kane ka Ingbishar bam banse ban leh na ka bynta ka jingmyntoi paidbah bad ka jingmyntoi jong ka hok ban pynmih shuh shuh ïa ki hukum kiba kham bniah,” ka la bynrap.
Shwa kane ha ka jingbishar, u Advocate General u la pyntip sha ka ïingbishar ba ka Sorkar Jylla ka ladep ban tyrwa ïa ka song jingïarap pisa da kaba mynjur ban siew ïa ka tulop ba manla u bnai jong ki nongtrei ka ban sdang naduh u bnai Naiwieng, 2025, kynthup ka jingsiew ïa ki tulop ba sahteng na ka bynta ki san bnai ba la leit noh bad la tyrwa ruh ïa ka GHAC ban siew ïa ka tulop ba sahteng 12 bnai ïa kaba ka NGEA ka sngew artatien bad kam pat lah ban pdiang.
U nongïasaid jong u nongshah mudui u S. Dey u la pynmih ruh ïa ka jingthoh ha ka 23.09.2025 kaba la thoh sha ka NGEA ha kaba la shim ïa ka rai ban pyllait noh ïa ka tulop kaba dang sahteng kaba kot 12 bnai bad shuh shuh hapoh ar snem, ka tulop kaba dang sah yn siew ha ki lai bynta bad kumjuh ruh ba ka tulop kaba mynta yn siew tista naduh ka 1 tarik, Naiwieng, 2025.
U Dey u la pyntip ba wat hadien ba la ai ïa kane ka jingtyrwa hynrei ka NGEA ka la kyntait mardor.
Ïa kane ka kam la buh sngi ban shong bishar biang ha ka 7 tarik, Risaw, 2025.