Mynta u snem yn pyndep sorbe lut ïa ka surok ba 22,664 klur ha Meghalaya, sah sa ha EJH

Shillong, Nailur 24 : Ka sorkar Jylla ka buh thong ba ka jingsorbe ïa ki jaka ban pynïaid ïa ka surok ba 22,864 klur ha Meghalaya kaba tip kum ka Greenfield High-Speed Corridor project yn pyndep noh mynta u snem hadien ba kiba bun ki jaka kum ha Ri Bhoi, Khasi Hills bad West Jaintia Hills ki la jan dep lut.
Ïa kane la ïathuh da u Symbud Myntri Rangbah ka Jylla ba peit ruh ïa ka tnad PWD, Bah Prestone Tynsong haba ken bad ki lad pathai khubor hadien ka jingïalang pyrkhat kam bad ki ophisar ha ka janmiet sngi Balang.
Katkum jingïathuh jong u Symbud Myntri Rangbah ka kam kaba kham bun kaba ïadei bad katei ka High Speed Corridor ka dei ha East Jaintia Hills hynrei watla katta u ong ba ki kyrmen ba yn lah ban pyndep lut hapoh mynta u snem.
“Kane ka surok Greenfield High-Speed Corridor project kaba jrong haduh 166.80 kilometer kan pynïasoh ia ka Mawlyngkhung, Umïam shaduh Panchagram kaba don ha khappud Assam. Ka jingsorbe ïa kane ka surok ka la jan dep mynta ha Ri Bhoi, Khasi Hills bad ha West Jaintia Hills,” u la ong da kaba bynrap ba ha ki bynta jong ka East Jaintia Hills namar ka jinglong ka jaka bad ka jinglong ka suinbneng kin kham shimpor katto katne.
Ha kane ka sngi, u Symbud Myntri Rangbah u la ïathuh ba ki la buddien ruh ïa kiwei ki projek kum ka Tura bypass, Western Bypass, bad kumjuh ka Shillong-Dawki road.
“Tang shu dep kine baroh, ngi khmih lynti ba ngin lah ban pyntreikam noh ïa kane ka projek kaba dei ka projek kaba heh tam ha ka thain shatei lam-mihngi kaba la kot sha ka 22,864 klur tyngka,” u la ong.
Haba ïadei pat bad ka Tura Bypass u la pyntip ba kane ruh ka la jan dep ha kaba ïa ka bynta kaba khatduh ban pynmih ïa ka 3G notification ka la don mynta ha lynti.
“Ngi don bynta ha ka jingpynkhreh ban wad ïa ki trai jaka khnang ba ymn lah ban siew noh ïa ka bai luksan. Baroh ki kam ki la don ha lynti bad nga tikna ba hapoh mynta u snem ngin sa lah ban sam lut ïa ka bai luksan kiba dei na ka bynta ka Tura Bypass,” u la ong.
Haba kren pat halor ka projek jong ka Western Bypass, u Bah Prestone u la ïathuh ba ka jingïaid ka kam ka long kaba ihun watla ki don katto katne ki ishu kiba hap ban pynbeit. Tangba ïa kane ruh u ong ba u la bthah ïa ki Deputy Commissioner jong ka Ri Bhoi bad kumjuh jong ka East Khasi Hills ban tuklar bad ban pynbeit noh kham kloi. U Bah Prestone ong ruh ba u kyrmen ba kane ka projek yn sa lah ban pyndep noh ha u snem ban wan.