Khlem lah kular u Myntri ïa ka jingdawa ki nonghikai Adhoc, bteng ka jingïakhih ha Malki

Shillong, Nailur, 23: U Myntri ka Sorkar Jylla uba khmih ïa ka tnat Pule Puthi u Bah Lahkmen Rymbui u la kyntait ban ai jingkular ïa ki nonghikai skul Adhoc kiba ïakhih da kaba ong ba ka Sorkar kan dang bishar bniah ïa ki jingai jingmut bapher bapher ha kaba ïadei bad ka jingthmu ban pynbeit ryntih ïa ki kyrdan jong ki skul ha ka jylla shwa ban shim ïa ka rai.
Ïa kane la pyntip da u Vice President jong ka Federation of All School Teachers of Meghalaya (FASTOM) u Bah Sanborn Jungai hadien ba la wai ka jingïalang bad u Myntri ka tnat Pule Puthi ha ka sngi Baar.
Namar ka jingbym hun ïa ka jingïakren ha ka jingïalang, ki nonghikai skul Adhoc ki la bteng ban shong kyllaiñ myngngor khlem pud sngi ha madan Malki.
U Bah Rymbui u la khot ïakren ïa ki nongïalam ka Federation hadien ba ki la sdang ïa ka jingïakhih shong kyllaiñ myngngor ba khlem pud sngi ha ka Lah Sngi U Blei ban dawa ïa ka Sorkar ba kan kyntiew kyrdan ïa ki skul Adhoc sha ka Deficit System.
Ha ka jingïakren bad ki lad pathai khubor, u Bah Jungai u la ong ba u Myntri ka tnat Pule Puthi u la pynsngew ba ka rai ban kyntiew kyrdan ïa ki nonghikai Adhoc sha ka Deficit System ka shong ha ka Review Committee bad ka jingai jingmut jong ki kynhun bapher bapher.
“U Myntri u la ïathuh ïa ngi ba ka Sorkar bad ka tnad ka ithuh ïa ka jingshakri bad ïa ka jingnoh synñiang jong ki nonghikai skul Adhoc sha ka jylla hynrei kumba ka long mynta ha kaba ïadei bad ki jingdawa jong ngi, ka Sorkar kan dang bishar bniah ïa ki jingai jingmut bad ïa ki jingpynsngew ba la ai da ki kynhun bapher bapher, ki seng saiñpyrthei bad ki School Managing Committee. Hadien ba ladep ban bishar bniah kin sa shim ïa ka rai.” u la ong.
Kane ka mut ba ka tnat ïa mynta ka dang pyrkhat kumno ban pynduna ïa ka jingbun kyrdan palat jong ki skul, u la pynpaw
U la pyntip ba u Myntri u la kyntait ban ai kano kano ka jingkular la ka Sorkar kan pyrkhat neem ban kyntiew kyrdan ïa ki skul Adhoc sha ka Deficit System namar kan shong eh ha ka Review Committee bad ka jingai jingmut jong ki kynhun bapher bapher.
Haba kylli, u Bah Jungai u la ong ba ka FASTOM kan bat beit ïa ka jingdawa ban kyntiew kyrdan sha ka Deficit System lane kaba kham duna eh, da ka Deficit Pattern, kaba kynthup ïa ka Basic Pay bad ka Dearness Allowances (DA).
U Bah Jungai u la ong ruh ba lada ka Sorkar ka kular ban siew da ka pay scale da kaba buh ruh ïa ka tarik ban pyntreikam, ki lah ban pdiang ïa kata ka sienjam.
“Lada ka Sorkar ka lah ban pynthikna ha ngi ba naduh kano ka tarik ne ka 1 tarik, Kyllalyngkot, ba kin ai ïa ngi ïa ka jingsiew, ngin sngewkmen ïa kata ruh,” u la ong
U Bah Jungai u la ong shuh shuh ba u Myntri Rangbah ka jylla uba dei ruh u Myntri uba khmih ïa ka tnat Pla Tyngka u donkam ban shim ïa ka rai halor kane ka kam, namarba kam dei tang ka kam jong ka tnad Pule Puthi.
Halor kaba mih ha ka jingïakren na ka jingïalang, u Bah Jungai u la ong ba ka FASTOM kan sa ïasyllok shwa bad ki dkhot ha Malki bad ha rilum Garo ban shim ïa ka rai kumno ban leh nangne shakhmat.
“Ka shong ha ka rai jong kiba bun ki nonghikai la kin weng noh neem ïa ka jingïakhih,” u la bynrap.