Shillong, Jylliew : U Rangbah Shnong ka Mawlai Mawroh u Bah Peter Lamare hynne ka sngi u la pynpaw sha u MLA Bah PT Sawkmie bad sha u Director ka DHS, Dr. Aman War ha ka jingdon ryngkat ka Kong Adrina Lyngdoh, ka DMHO ba la donkam kyrkieh ban kyntiew kyrdan noh ïa kane ka Primary Health Centre sha Community Health Centre.
ïa kane u la pynpaw ha ka jingïalang ba lyngkot ba la pynlong ha phyllaw ka Mawroh CHC, ha ka ba u la ïathuh ruh ïa ki daw halor ka jingdonkam kyrkieh ban kyntiew sha ka CHC, namar kane ka CHC ka shakri na ka bynta palat 40,500 ngut ki paidbah nongshong shnong kiba kynthup ïa ki ba naduh Lyngkyrding, Shyiap, kiba hap hapoh ka Pynthorumkhrah Konstitwensi, nalor ki shnong ha ka thaiñ Mawlai.
U ïathuh ruh ba ki la dep phah shithi ha ka ba ïa dei bad kane ka jingkyntiew kyrdan sha ka ophis DHS bad la ai kopi ruh sha u MLA. U bah Lamare u ïathuh ba u MLA Bah PT Sawkmie u la dep kren ruh shaphang kane ka jingkyntiew kyrdan na ka PHC sha ka CHC wat hapoh ka Assembly.
Katba na ka liang u Bah PT Sawkmie u pynpaw ban kyntiew kyrdan na PHC sha CHC kam dei shuh kaba eh, ka ba kham eh ka dei ban ïoh ïa ka PHC. U pynpaw ruh ba u la ïai buddien ïa kane ka jingkyntiew kyrdan bad kane ka dei ka jingtyrwa (proposal) jong u ka ba u la buh hakhmat ka sorkar naduh ka snem ba la dep ha ka ba u la pynpaw halor ka jingdonkam ban kyntiew kyrdan ïa kane ka PHC.
Ha kajuh ka por ha kane ka sngi u Dr. Aman War, ha ka jingkren jong u u la ïathuh ba kane ka dei ka bynta ba hakhmat eh jong u Bah PT Sawkmie ban kyntiew kyrdan na PHC sha CHC.
Ha kane ka sngi la ïoh ruh ka jingkren na I DMHO bad na u secretary shnong bah T. Hynniewta ba la ai khublei ïa baroh.
Hadien kane u Bah PT Sawkmie bad u Excutive Engineer ka PHE ba la synran lang da kiwei ki nongtrei ka PHE ryngkat bad ka bor shnong ki la leit jurip sa ïa ka jaka pump um (Borewell) kaba la sniew kaba don hapoh shnong Mawroh na ka bynta ban maramot pynbha pat ïa ka bad kumjuh ïa jaka pump um kaba don hajan skul shnong.
Nalor kata u MLA hadien ba dep jurip u la kyntu ïa u EE ban shimkhia lem ban khmih ba kiei kiei kin ïaid beit ïaid ryntih ha ka ba ïa dei bad ka um ha Mawroh.
Shuh shuh u la kren ruh halor ka Jal Jeevan Mission, ïa kaba u la pyntip, ynda la dep lut ki kamram bad ka Mawlai ka la hap hapoh ka NREGS, kin sa lah ban pyntreikam ïa ka JJM hapoh ka thaiñ.
Ha kajuh ka por u la pynpaw ruh ïa ka jingsngewkhia bad jingduh mynsiem ha ba kren shaphang ka phase 3 jong ka Greater Shillong Water Supply Scheme, namar ka jingbym don ba shimkhia halor kane ka phang.
