Palat 300 ngut ki khynnah pule ka jylla ki la pass na ka ‘Soft Skill Training’ lyngba ka Aspire Meghalaya

Shillong, Jylliew :Ha ka jingpyrshang ban pynkhreh bad pyntbit ïa ki samla ka jylla na ka bynta ka lawei jong ki, ka Sorkar Meghalaya lyngba ka Sports & Youth Affairs Department, ryngkat ka jingsnohkti lang da ka Education Department, ka la pynlong ïa ka program ‘Aspire Meghalaya’ ha baroh 12 tylli ki distrik ba la pynïaid da ka AVENUES, Shillong. Kajingthmu jong kane ka program ka long ban pynkhrehïa ki khynnah pule shwa ba kin rung sha ka jylli ka wad kam wad jam bad ruh ban pynshlur ïa ki ha ka ban sei ïa ki sap ki phong khnang ba yn ïoh ban pynïasoh ïa ki bad ki skhim bapher bapher jong ka sorkar jylla.
Ha ka ba ïadei bad kane, 3182 ngut ki khynnah pule na ki 15 tylli ki skul ha ki distrik bapher bapher hapoh ka jylla ki la ïoh diang ïa ka soft skill training bad talent identi fication program lyngba ka Aspire Meghalaya kaba la pynlong mynta u bnai.
U Myntri Rangbah (CM) ka jylla, u Conrad K. Sangma u la plie pyrda ïa ka Aspire Meghalaya ha u bnai Lber mynta u snem kum kawei na ki jingpyrshang hapoh ka Meghalaya Youth Engagement and Training Programmes.Haba kren shaphang kane, u la ong, “Ka Aspire Meghalaya ka long ka program kyrpang na ka bynta ki khynnah samla jong ka jylla jong ngi. Ka long ka rynsan ha ka ba ki lah ban ïoh jinghikai halor ki jingpyntbit bapher bapher, khnang ba kin ïoh poi sha ka jingjop ha ka lawei jong ki.”
Shi bynta na ka jing thmu jong ka Aspire Meghalaya ka long ban ai lad ïa ki khynnah samla ban pynsngew ïa ki jingïakyn duh bad jingangnud jong ki ha ka liang ka imlang sahlang, ka pule puthi bad khamtam eh ha ka ba ïadei bad ka lawei jong ki. Ha ka ba ïadei bad kane, la lah ban pynïaid ïa ka Meghalaya Youth Survey ha ka ba haduh palat 50,000 ngut ki khynnah pule jong ka jylla ki la ïoh ban shim bynta da kaba ai ïa ki jubab jong ki lyngba katei ka survey.
Ka bynta kaba ar jong ka Aspire ka kynthup ïa ka jingai training ïa ki khynnah pule ha ki skul jong ki ha ka liang ki soft skill lyngba ki workshop ba ai jinghikai ha ka jingshlur (Confidence), ka rukom pyrkhat shai ïa ka lawei (Clarity), ka rukom pynïadei bad kren para briew (Communication) bad ka jinglah ban ïaid shaphrang lyngba ki jingeh bad jingïakynduh bapher bapher (Emotional Resilience).
U samla Sameki Syngkon, uba shong ha ka klas 12 hapoh ka skul Ummulong Presbyterian Higher Secondary School, u la ai mynsiem ïa ki para samla da ka ba ong, “Baroh ngi long ki ba stad bad ngi don la ki jong ki sap, hynrei kum ki khynnah samla bunsien ngi lehraiñ lane tieng ban pyni ïa ki. Nga ngeit ba baroh na ngi, ki ba la shah hikai lyngba ka Aspire Meghalaya, ngi la ïoh jingmyntoi shibun. Te namar kata, nga kyrpad ïangi lang baroh ban ngin pynduh ïa ka jinglehraiñ jong ngi ban pyni ïa ki sap kiba ngi don. Haba ki nonghikai ki khot ïangi, ngim dei ban artatien hynrei ngi dei ban mih shakhmat da ka jingshlur.”
Ha ka jingkren ha kawei na ki graduation program, u Bah Salanbor Kamar, SSA office, Education Departm ent, u la ïaroh ïa ka jingtrei shitom ki nong pynïaid jong kitei ki skul bad ka Avenues. U la pynshlur ruh ïa ki khynnah da ka ba ong, “ïa kane ka program, la pynkhreh kyrpang na ka bynta jong phi, ban ïarap ïaphi ban sngewthuh bad ithuh shai ïa ki sap bad ki jingthmu ki ba phi don, bad ruh ban wad bad jied ïa ki lynti kamai jakpoh ba biang tam na ka bynta ka lawei jong phi shimet.” U la ban ruh halor ka jingkloi jong ka District Sports Office hapoh ka Sports & Youth Affairs Department, ban ïarap ai mynsiem bad kdew lynti, khamtam eh ïa kito kiba thrang ban pyntbit ïalade ha ka liang ki jingïalehkai sports, da ka ba kyrmen ba ka jylla kan ïohi bun ngut ki nongmihkhmat ha ki rynsan bapher bapher hapoh ka Ri India bad ka pyrthei ruh kumjuh.
Lah ban ong ruh ba ka Aspire Meghalaya ka thmu ban leit sha palat 60 tylli ki skul hapoh ka jylla bad ban ai jinghikai ïa palat 10,000 hajar ngut ki khynnah pule hapoh une u snem.