Shillong, Nailur 22 : Ki nongïalam jong ka National People’s Party (NPP) ha ka sngi Nyngkong ki la leh burom khatduh ïa u State Secretary ka party Bah Kupar Blah ha ka jingïalang kaba long ha ophis treikam ka party kaba don ha Bivar Road, Shillong.
Ha kane ka jingïalang sngewlem la donlang naduh u Working President ka NPP Bah Hamlet Dohling, kiwei pat ki nongïalam ka party nalor ki nongïalam jong ka National Peoples’ Women Front bad kumjuh ruh ki nongïalam jong ka National People’s Youth Front nalor kiwei kiwei.
Baroh ki nongkren ha kane ka jingïalang sngewlem ki la pynkynmaw ïa ka jingnoh synniang jong une u rangbah uba la don bynta lang bad ka party naduh kaba sdang.
Na ka liang u Bah Babeth Sangma uba dei uwei na ki nongïalam ba rangbah tam jong ka party, u la ïathuh ruh ba une u rangbah u la dei uwei na ki rishot ba skhem ban kyrshan ïa ka party naduh ka por ba ki sdang ïa ka NPP bad u ïai neh tad haduh ki sngi ba khatduh jong u.
Katba na ka liang u Bah Hamlet pat u la ïathuh ba baroh ki ñiew burom ïa u Bah Kupar Blah namar ka jingaiti lut jong u ban trei na ka party.
Hadien kane la don ruh ka jingsngap jar kaba shipor ban duwai na ka bynta ka mynsiem jong une u rangbah ba la khlad noh.
Na ka liang u National President ka party ba dei ruh u Myntri Rangbah ka Jylla Conrad K Sangma u la phah lang ka jingsngewlem halor kane ka jingkhlad noh jong u Bah Kupar Blah.
