Shillong, Nailur 22: Ka North Eastern Indira Gandhi Regional Institute of Health and Medical Sciences (NEIGRIHMS), Shillong, ha ka sngi Nyngkong ka la pynlong ïa ki jingpynsngewthuh paidbah halor ka koit ka khiah bad ki prokram shakri hapoh ka Swasth Nari Sashakt Parivar Abhiyaan (SNSPA), kaba ka dei ka prokram jong ka ri kaba thmu ban pynkupbor ïa ki long kmie bad ki longïing lyngba ka koit ka khiah bad ka jingbam kaba tei met. Ha kane ka prokram la wan ban ïashim bynta da ki doktor, ki nongtrei ka koit ka khiah, ki samla pule bad ki dkhot na ki shnong haba ki la pynlong ïa kane ka prokram kaba ïaid beit ïaid ryntih.
Kane ka prokram kaba kynthup ïa ki tnat jong ka NEIGRIHMS, la pynlong naduh ka 17 tarik mynta u bnai haduh ka 2 tarik u Risaw, 2025, bad kaba kynthup ïa kiba bun ki kam kiba dei naduh ki kam screening bad ki jingpynsngewthuh paidbah sha ki shnong da kaba pynlong ruh ïa ki health camp.
Kum shi bynta na kane ka kam ïalap, ki la don 4 bynta ki jingai jinghikai bad ki prokram ai jingshakri kiba la pynlong ha kane ka sngi. Ka jingpynsngewthuh shaphang ka koit ka khiah ha ka bor pyrkhat la pynlong ha Old Age Home, Shillong, kaba kren shaphang ka jingsumar ïa kiba la tymmen, ka jingsumar dalade, bad ka bha ka miat ha ka bor pyrkhat. La pynlong ïa ka blood donation camp haba la shim bynta da ki nongtrei, ki samla pule bad ki nongshong shnong.
Ha ki skul, la pynleit jingmut halor ki samla lud da ka prokram menstrual hygiene bad ka bam batei met ha Mawpat Presbyterian School, Shillong, ba la ïalam da ka Department of Obstetrics & Gynaecology bad ka Dietary Unit.
Hapoh ka OPD ka NEIGRIHMS, ki nongpang ki la poi ban ïoh ki jingïasyllok ban phah check-up, kaba kynthup ïa ka jingkhmih bniah ïa ka jingpang tuberculosis bad common non-communicable diseases kum ka hypertension bad diabetes, physiotherapy service, nutritional assessments, ka jingsam ïa ki IFA bad ki tablet calcium, ka jingïasyllok halor ka hygiene bad kiwei pat ki lad jingïada kiba donkam na ka bynta ka koit ka khiah bad kiwei kiwei.
Haba kren ha ka prokram u Prof. Star Pala, Department. Of Community Medicine, NEIGRIHMS, u la ong, “Ki la don kumba 4 tylli ki awareness programme ba la pynlong mynta ka sngi halor ka mental health ba la pynlong ha Old Age Home, blood donation camp, bad ka awareness programme ha Presbyterian School Mawpat, ka jingkhmih bniah ïa ki nongpang ha OPD. Ka la long ka jingsdang kaba bha khamtam na ka bynta ka koit ka khiah khamtam na ka bynta ki longkmie. Ngi pyrkhat ban bteng ïa kine ki kam palat ïa ka 2 tarik u bnai Risaw kumjuh.”
Katba u Prof. (Dr.) Suvamoy Chakraborty, Medical Superintendent, NEIGRIHMS, u la bynrap shuh shuh ïa ki kam shakri bad ki lad ki lynti kiba la ai ha kane ka kam ïalap. U la ong, “Mynta hapoh ka hospital jong ngi phi la ïohi ba la buh 5 tylli ki kiosks, bad ki special clinic.”
U la bynrap ruh ba kum kine ki jingpynsngewthuh pynlong ruh na ka bynta ki BSF, 101 Area Army, Air Force, bad Assam Rifles ha Meghalaya.
