Khliehriat jylliew 29: Ka ophis u Deputy Commissioner ka East Jaiñtia Hills District, mynta ka sngi ka la pynlong ïa ka jingialang ba kyrpang na ka bynta kito ki lanot kiba shah lynshop ha ki bor ka mariang bad kito kiba duh noh ïa ki iïng ha ka jingpluh iïng.
Ha ka mang tyngka kaba T 1748924 tyngka la sam jingiarap sha ki 58 tylli ki longiïng kynthup ruh kito kiba shah ktah ha ki bor ka mariang bad kito kiba phluh iïng. Haba kren kum u kongsan, u myntri ka sorkar jylla, uba dei ruh u MLA ka thaiñ , u bah Kyrmen Shylla, u la kyntu ïa ki Block Development Officer, ïa ki Gramsevak bad ki Waheh Shnong ba kin sngewbha ban ai kham kloi ïa ki kaiphot lada don kino kino kiba shah ktah ha ki bor ka mariang bad lada don kano kano ka jingpluh iïng “Ngi kwah ba kito ki lanot kiba ngat ha ki jingpluh iïng ba ki dei ban ïoh jingiarap noh kloi tang hapoh ka ar taiew ba kin ioh jingiarap kloi na ka ophis u Deputy Commissioner bad na ka tnat Disaster” ong u bah Kyrmen Shylla.
Haba kren halor ka pisa ba la ai jingiarap sha kitei ki lanot, u bah Kyrmen Shylla, u la ong ba kane ka jingai ka long kaba dang rit haba ianujor bad kaba la duh noh ha ka jingshah lynshop, hynrei ym lah ban leh eiei namar ka tnat kam lah ban shu iaid lait na ki kyndon jong ka NDRF bad ki kyndon jong ka SDRF.
U bah Kyrmen Shylla, u la iathuh ruh ba ka East Jaiñtia Hills ka long kaba donbok ba napdeng kitei ki cgeque kiba la sam sha ki 58 ngut, ka dang don shuh shuh ka pisa ba la pynioh da u Deputy Commissioner, u Abhilsah Banarwal, IAS ha kaba kan kan iarap shuh shuh ïa ki paidbah ban ioh ki lad ban noh jingiarap shuh shuh sha kito kiba shah lynshop bad kane kan iarap ïa ki ba kin ïoh lad ban sdang biang ïa ka kam ba ki ju trei.
La ioh ka jingkren pdiang burom na u Deputy Commissioner, u Abhilasah Banarwal, IAS, la ïa don ryngkat lang ruh ki ADC East Jaiñtia Hills, u bah J.Shylla bad u bah S.S. Syiemlieh.
