Ïam ka longkmie ba thiah pang u kurim lah ar snem tam, hap phah pep skul ïa ki khun

Nongstoiñ, Jylliew, 29: Ka jingnang jingstad ne ka pule puthi ka dei kawei na ki mat kaba kongsan bha ïa la ki kmie ki kpa ba kin pynheh pynsan ïa la ki khun khamtam ha kum kane ka juk kaba mynta.
Hynrei, haba ka jingduk ka wan ban lynshop kynsan kynsan ïa kawei ka longïing jong kawei ka longkmie, ïa kaba la tip kyrteng kum ka kong Bibiana Khardewsaw, ha kaba ka la hap ban pynpep skul noh ïa la ki khun, tang namar ka daw jong ka jingban palat ka jingduk.
La ong ba ka jingkordit ka la wan hadien ba u kurim jong ka, ïa u ba la tip kyrteng kum u bah Wasstar Lyngkhoi, u la ïoh ïa ka jingpang Cancer na ryndang mynta la kumba 2 snem ei ei.
Nalor katei ka jingpang, mynta ka kynti ka la ban sa kawei pat ka jingpang kaba ym lah ban tip la ka dei ka jingpang kaba kumno, namar u tei u rangbah u la shu ring sdot ring swai bad u la hap ban shu thiah beit, khlem da lah shuh ban ïaid ban ieng bad ban leit bylla, namar u tlot ha ka bor met bad u pang ki thied kjat.
Katei ka longïing ka dei kaba na ka shnong Domkohsam, kawei na ki shnong kaba ha ka thaiñ Nongstoiñ West Khasi Hills District bad ha katei ka shnong don tang kawei ka skul mission jong ka balang Katholik.
Ka long shisha kaba I sangsot ban peit ban peit ïa katei ka longïing bad na ka liang katei ka longkmie, ka la kyrpad ruh ba lada don tang kiba lah ban ïarap bai dawai ruh, katno kan long ka jingkyrkhu, namar yn da u kurim jong nga un khiah, ka ngeit ba kiei kiei baroh ki jingdonkam ha ïing kan sa long kaba kham bha.