Jowai, Nailur, 21: Ka Mukhla Dorbar Pyllun ha ka sngi Saitjaiñ ka la pynkup burom ïa u MLA ka Jowai u Bah Wailadmiki Shylla uba long ruh u Myntri jong ka Sorkar Jylla ha ka jingïalang ba la pynlong ha Dorbar Hall ka Mukhla Dorbar Pyllun bal a pynïaid da u President jong ka Mukhla Dorbar Pyllun u Bah Hamran Shylla.
La ïoh ïa ki kyntien pdiang sngewbha da u Bah Hachwa Suna General Secretary Mukhla Dorbar Pyllun, la wan ban ïashim bynta da ki 5 Shnong hap hapoh ka Mukhla Dorbar Pyllun kiba kynthup ïa ka Dorbar Shnong Mukhla Mission, Dorbar Shnong Mukhla Nongrim, Dorbar Shnong Mukhla Shohshrieh, Dorbar Shnong Mukhla Umlangshor bad ka Dorbar Shnong Ladmukhla.
Ha kajuh ka por la pynkup burom ïa u Bah Wailadmiki da ka Seiñ Kyntu Dorbar Niamtre Mukhla Umlangshor bad na ka Seiñ ki longkmie.
Kiwei de kiba ai jingkren ki kynthup ïa u Bah Bahrtu Sari Treasurer NPP Party West Jaiñtia Hills District, Bah Ebormi Lyngdoh President NPYP West Jaiñtia Hills District, ha kaba khadduh la ai jingkren da u Bah Wailadmiki Shylla MLA uba la pynpaw ka jingsngewnguh kaba khraw eh ïa ka shnong hi baroh kawei, da kaba kular ruh ban trei shitom na ka bynta ka jingbha jingmiat jong kiba bun balang ha kine ki sngi ban wan.
