Mawkyrwat, Jylliew, 29:Ka Pyrkhatlang Village Organisation (VO), Domjyrti mynta ka sngi ka la pynlong ïa ka prokram ha kaba ïa dei bad ka Meghalaya State Livelihood Society, Kudumbashree, Society ha Community Hall jong ka Shnong Domjyrti ha ka jingïadonlang jong u bah I. Lawrynniang, Block Development Officer jong ka Mawkyrwat C&RD Block, u Manu Sankar, Executive Director – Kudumbashree National Resource Organisation, ki dkhot jong ka Pyrkhatlang Village Organisation bad kiwei kiwei de.
Ha kane kajuh hi ka sngi la ïoh ban plie ïa ka Nutri-Garden ha kaba la bet ïa ki symbai jhur bad ki jhur ki jhep kiba mih nangne kin leit sha ka Aganwadi Centre kaba don ha kane ka shnong Domjyrti ha kaba ïa kane ka Nutri-Garden la ot ribon da u bah I. Lawrynniang, Block Development Officer, Mawkyrwat C&RD Block.
Ka jingthmu ba kongsan jong kane ka prokram ka long ban pynkupbor ïa ki kynthei da kaba ïarap ban kyntiew ïa ka ïoh ka kot ha ïing ha sem bad ha ki shnong ki thaw da kaba ïatreilang bad ki shnong ki thaw bad ki tnat sorkar bapher bapher lyngba u synñiang jong ki na ka bynta ban thaw thymmmai bad pynkylla dur ïa ki longïing longsem, ki shnong ki thaw bad ban wanrah ïa ka roi ka par ha ka imlang ka sahlang lyngba ki projek kiba la mang da ka sorkar bapher da kaba ïasnohktilang bad ki tnat ka sorkar jylla ha ka ban kyntiew ïa ki longïing longsem bad ki shnong ki thaw.
Lah ruh ban pynkynmaw hangne ba ki don kumba 12 tylli ki Self Help Groups bad kumba 60 tylli ki longïing ha kane ka shnong bad ïa kane ka Pyrkhatlang VO la seng ha ka 22 tarik u Naitung, 2016 kiba ka ktien phira ka long, “Ban nang kiew bad ban phyrnai lang” (Rise and Shine Together). Kane ka project kan ai jingmyntoi bad ha kajuh ka por ka pynkupbor ïa ki kynthei ha kaba kin lah ban ai jingkyrshan lang ha ka ïing ka sem bad kumjuh ruh ha ki shnong ki thaw lyngba u synñiang uba ki noh lyngba ka jingpyntreikam ïa kane ka projek na ka bynta ban kyntiew ïa ka ïoh ka kot ha ka jylla baroh kawei. Kane ka Organisation ka la ïoh ruh ban thaw ïa ka Children’s Group Organisation kata ka Syntiewbarit Organization bad ka Jingkyrmen Organization kiba long ki kynhun kiba nyngkong tam ha ka jylla Meghalaya. Lah ruh ban ong ba kane ka kynhun ka la sdang ban kiew lyngba ka jingtreishitom jong baroh ki dkhot kiba don ha ka.
U Manu Sankar uba long u Executive Director (ED) ka National Resource Organisation ha ka jingkren jong u u la ïaroh ïa ka jingshlur bad ka jingbymriej ne sheptieng jong ki da kaba ong ba kane ka jinglong ka pyni ba ki thrang bad shimkhia ha ka ban pynïaid bad pyntyllun ïa ka kam na ka bynta ban pynurlong ïa ka jingthmu jong ki kaba long ban rat dyngkhong ïa ka jingduh bad jingkyrduh. Ha kajuh ka por u la ai mynsiem ïa ki ban trei khambha shuh shuh namar wat tang ha ka por kaba lyngkot ki la lah ban leh shibun kiei kiei kiba long ka jingmyntoi bad ba wanrah ka jingjop ha kaei kaba ki ki trei bad u kyrmen bad khmih lynti ba kin nang ïai trei shitrhem nangne shakhmat ha ka ban wanrah ïa ka dap ka biang bad ka jingsuk kiba long ki lad ki lynti ban kyntiew ïa ka ïoh ka kot bad ban rat dyngkhong ïa ka jingduk jingkyrduh bad ha kajuh ka por ban long ka nuksa ïa kiwei ba lah ban leh ïa shibun kiei kiei lyngba ka jingtrei bad ka jingïasnohktilang.
Haba kren ha kane ka jingïalang u bah Isagahah Lawrynñiang, BDO u la pynpaw ïa ka jingsngewkmen ba kane ka kynhun ka la nang kiew bad ïoh ïa ka jongjop ha ki jingpyntreikam ïa ki skhim jong ka sorkar India ha kaba ki la lah ban wanrah ïa shibun ki jingmut bad ki jingpyrkhat kiba thymmai kum ha kaba thaw ïa ka Children’s Group bad ban ai jinghikai ïa ki khynnah kiba don ha kane ka kynhun kumno ban pynlang pisa naduh ba ki dang rit na ka bynta ka jingmyntoi jong ki hi khnang ban lah ban tehlakam bad rat dyngkhong ïa ka jingduk bad jingkyrduh.
Shuh shuh u la ong ba kane ka jingïadonbynta lang jong ki kynthei kan wanrah shibun ki jingmyntoi bad ki jingkylla ha ka imlang sahlang da kaba pynshlur bad ai mynsiem ba kin nang trei khambha shuh shuh ban kynjoh sha ka thong kaba ki thmu bad ban long ka nuksa ne nongmuna ïa kiwei pat. Ha kajuh ka por u la pynpaw ba lyngba kine ki prokram ki lah ban pynsngew ym tang ïa ka jingjop jong ki hynrei ban pyni ïa ki jingeh kiba mad bad ïakynduh na ka bynta ban wanrah ka jongjop ha ki shnong ki thaw jong ki.
Katba na ka liang ka kong M. Kharmalki, State Mission Manager ka SMMU, MSRLS, Shillong ka la kren khyndiat halor ka jingmaitphang ïa kane ka kynhun kaba la ïaid shakhmat ha ka ban pyntreikam ïa ki skhim bad projek ba la mang da ka sorkar India ym tang na ka bynta ban kyntiew ïa lade shimet hynrei ban ïarap ïa kiwei bad ban noh synñiang lem sha ka imlang sahlang.
U bah Bokstar Nongsiej, Myntri Shnong Domjyrti ruh u la ai nongkren ha kane ka sngi, ka kong Philis Kharwan-niang ka la long ka nong-pynïaid ïa kane ka jingïa-lang, ka kong M. Lyngkhoi, Secretary ka Pyrkhatlang Village Organisation ka la ai ïa ki kyntien pdiang sngewbha katba ka kong Rila Kharlyngdoh, DPM ka la ai ki kyntien khublei.
