Nongstoiñ, Nailur, 14: U State President jong ka National Peoples Party (NPP) Bah Prestone Tynsong ha ka sngi Saitjaiñ u la hiar sha ka shnong Nongkroh, West Khasi Hills District ban pdiang burom ïa u MDC shimet ka Rambrai-Jyrngam Constituency u Bah Lurshai Kharbani sha ka National Peoples Party.
Kum ban pynkynmaw ba u Bah Lurshai Kharbani u dei u MDC shimet uba la jop ha ka elekshon kaba la long mynta u snem. Hadien ba u la jop u la don lang bad ka Liang Pyrshah hapoh ka ïingdorbar jong ka Khasi Hills Autonomous District Council (KHADC) bad mynta u la leit ban pynïasoh noh bad ka NPP kum u dkhot ba pura.
Ha ka jingïalang pdiang burom ïa u Bah Lurshai sha ka NPP ba la pynlong ha ka Hall jong ka St.John Hihger Secondary School Nongkroh la ïadon ryngkat ki nongïalam jong ka NPP na kylleng ki jaka bad da ki spah ngut ki paitbah nongkyrshan.
Ha kajuh ka por la ïoh ïa ka jingkren na ki nongïalam ba hakhmat jong ka party bad khatduh eh la pdiang burom ïa u bah Lurshai da u Bah Prestone Tynsong uba long ruh u Symbud Myntri Rangbah ka jylla.
Da kane ka jingpynïasoh jong u Bah Lurshai, mynta ka NPP ka la kiew sha ka jingdon 5 ngut ki MDC ha iingdorbar thawaiñ jong ka KHADC kaba don 30 ngut ki dkhot.
