U Bah Lapang u la trei khlem shongthait na ka bynta ka bha ka miat ka jylla: Limison Sangma

Shillong, Nailur 14: U Symbud Lamphang ka Ïingdorbar Thaw aiñ ka jylla u Limison D Sangma ha ka kyrwoh khubor sngewlem u la pynpaw ïa ka jingsngewsih halor ka jingkhlad noh u Myntri Rangbah barim ka jylla u (L) Dr. D D Lapang ha ka 12 tarik mynta u bnai bad ong ba ka jingkhlad kyndit jong u, ka dei ka jingduh kaba khraw ïa ka jylla bad ki nongshong shnong jong ka.
“U (L) DD Lapang u la dei u riew saiñ pyrthei ba shisha uba la aiti ïa ka jingim sha ka kam shakri paidbah, u la trei khlem shong thait na ka bynta ka bha ka miat bad ka jingkiew jong ka jylla Meghalaya,” pynpaw u Symbud Lamphang ka Ïingdorbar Thaw Aiñ ka jylla.
Ha ka kyrwoh sngewlem u la pynpaw ruh ba u Bah Lapang u la long u nongïalam ba la tip halor ka jinglong sngewrit, uba shemphang ha ka saiñ hima sima bad uba lah ban pynïatylli ïa ki briew na ki party bad kynhun bapher bapher.
“U la shakri ïa ka jylla da ka kam isynei bad ka kyrdan, bad iehnoh shadien ïa ka jingkwah paw burom bad kiwei kiwei,” pynpaw biang u Symbud Lamphang ka Ïingdorbar Thaw Aiñ.
Lyngba ka kyrwoh u la pynpaw ka jingsngewlem ïa ka ïing ka sem jong u, ki paralok bad ki nongshong shnong ka Meghalaya ha kane ka por ba la duh ïa une u nongïalam ka jylla. “Aiba ka mynsiem jong u kan ïoh ka jingjahthait bymjukut bad ai ba ka jinglong jong u kan bteng ban ai mynsiem ïa ki pateng ban wan,” pynkut ka kyrwoh na u Symbud Lamphang ka Ïingdorbar Thaw aiñ ka jylla.