Shillong, Nailur 14 : U Chairman jongka North East Coordination Congress Committee (NECCC) U Nabam Tuki ula pynpaw ka jingsngewsih halor ka jingkhlad noh jong u Dr D.D Lapang Myntri Rangbah ba rim ka jylla Meghalaya bad Chairman ba rim ka NECCC.
U la ong ba u Dr Lapang um long u nongïalam uba khraw tang ha ka jylla hynrei ha kane ka thaiñ shatei lam mihngi hi jongka ri India baroh kawei. Ka jingkiew jongu ha ka saiñ pyrthei ka dei ka jingtrei shitom jongu ban long u Myntri Rangbah haduh san sien lynter. Ka jingïaid lynti jongu ka long ban ai ka jingshakri ba paka tam ïa ki paidbah da ka jingshemphang, ka jingstad bad ka jingtbit bad u la long ruh ka nuksa ïa kiba bun ki riew saiñ pyrthei khamtam kiba dang rung thymmai sha ka saiñ pyrthei. Ka jingshim khia jongu ban seng ïa ka NECCC ka long ban pynkhlaiñ ïa ka party bad ban ïoh pynsngew ruh da kawei ka sur sha Delhi.
Kumu Chairman ka NECCC u ïasnohkti lang bad ki paid ka jylla ban ïasngewsih lang bad phah ruh ïa ka khubor sngewlem sha ka long ïing longsem jong u Dr Lapang. Ka jingkhlad jongu ka long ka jingduh kaba khraw ïa ki paid nong Meghalaya bad ïa ka thaiñ hi baroh kawei.
