Jowai, Nailur 12: Ka District Institute of Education (DIET) Thadlaskeiñ, West Jaiñtia Hills mynta ka sngi Thohdieng kala rakhe ïaka Jubilee Rupa ne ka jingdap 25 snem (Silver Jubilee) haka jingshakri ïaka rukom ai jinghikai ba janai ïaki nonghikai.
Na ka liang ka kong R.S Manners, Director, Educational Research and Training, Meghalaya kala long kum ka kongsan, haka jingdonlang u bah P. Lhuid, Executive Engineer PWD Building kum u symbud kongsan, ka Dr. B. Danibha Pyrbot, Principal of DIET ki nonghikai bad kiba la dep ban shah hikai.
Ka kong R.S Manners, kala pynbna paidbah bala plie ïa kane ka jinglehkmen jong ka jingdap 25 snem ka DIET, haka jingkren kala ai khublei kyrpang ïa kane ka jaka hikai DIET kaba la kynjoh sha une u mawjam ban ai jinghikai ïa ki nonghikai kumno ban saiñ dur ïa ka pule ka puthi lyngba ki rukom ai jinghikai ba thymmai.
Kala pynsngew halor ka jingkiew kyrdan jong kane ka jaka hikai naka BTC sha ka DIET, ryngkat ka jingthmu ban pynbha shuh shuh ïa ka lawei jong ka pule ka puthi lyngba ka DIET kaba don hapoh kane ka thaiñ. Ha ka juh ka por kala ai mynsiem ïa ki nonghikai kiba wan shah hikai ha kane ka shlem ba kin shim ïa kane ka babu ksiar ban pyntbit shuh shuh ha kane ka jaka ïa kiba la jied kyrpang na kiba bun.
Ka Dr. B. Danibha Pyrbot, Principal of DIET, kala ong ka jingïoh ban rakhe ïa ka Silver Jubilee ka long halor ka nongrim jong ka jingshañiah ïa ka rukom treikam bad kaba dang bteng haduh mynta. Kala pynsngew ruh halor ka jingïaid lynti jong kane ka jaka ai jinghikai ïa ki nonghikai, da kaba kdew ki don da ki hajar ngut ki nonghikai kiba la ïoh jinghikai na kane ka jaka DIET’s bad kala long ruh kaba jop daka jingtreilang naduh ki nonghikai, ki nongtrei bad ka shnong ka thaw.
La ïoh ruh ka jingkren ha kane ka sngi na u bah P. Lhuid, Executive Engineer PWD Building, u bah Stephanson Blah uba la pdiang sngewbha ïa baroh sha katei ka jingïalang, katba u bah Nathaniel O. Jyrwa ula ai ki kyntien ai khublei.
La pynphuh shuh shuh ïa kane ka sngi da ki jingrwai, ki jingshad bad kiwei de ki prokram bapher bapher, ha ka juh ka por la pynkup burom ïa kiba wan shakhmat haka batch 2023-25.
Ïa kane ka (DIET) Thadlaskeiñ, la seng ha u Nailur, jong ka snem 2000 kaba la ai jingkyrshan shibun eh haka liang ka jingpule, kaba ïarap kumjuh ïa ki prokram naduh ki kyrdan jingpule ba rit bad kumjuh ïa kiba la heh bad kala long ruh ka jaka pule na ka bynta ka lawei ban pynwan dur ïa ka rukom ai jinghikai ïaki nonghikai hapoh ka District.
