Shillong, Nailur 11: Ka Tynring SC bad ka Lumshyiap SC ki la jop ïa la ki jong ki jingïakhun jong ka lympung Shillong Sports Association Second Division Football league 2025 kiba la long hynne ka sngi Thohdieng (12 tarik Nailur, 2025) ha madan First Ground-SSA Stadium, Polo.
Ka Tynring ka la pynliem noh da 2-1 kol ïa ka Sohiong SC ha ka jingïalehkai kaba nyngkong, katba ka Lumshyiap SC ka la jop da 4-1 kol ïa ka Jongksha SC ha ka jingïalehkai kaba bud jong kane ka sngi.
Ki ar kol jong ka Tynring la thep da u Jovinal M Pdah (2’min) bad u Damonlang Sylliang (22’min), katba ka shi kol jong ka Sohiong la thep da u Banshanlang Janong (34’min).
Ha ka jingïalehkai kaba bud la ïohi ïa ka Jongksha kaba la lamkhmat ïa ka kylla step da kaba pynkhihjar ha ka minit kaba 10 lyngba u Pyniaidlang Songthiang, hynrei ka Lumshyiap ka la wanphai da kaba tyngeh ha ka kylla miet da kaba thep saw tylli ki kol ban pynthikna ïa ka jingjop.
Napdeng ki rangïalehkai ka Lumshyiap u Kitbok Maskut u la noh synñiang da kaba thep ar kol (48 & 72’), katba u Fairborn Lyngdoh (57’min) bad u Donborlang Kharnaior (60’min) ki la thep mar kawei.
Ha kane ka sngi Saitjaiñ (13 tarik Nailur, 2025) kin don ar tylli ki jingïalehkai jong ka SSA 2nd Division Football league 2025, ka ban sdang nyngkong ha ka por 11 baje mynstep hapdeng ka Umphyrnai SC bad ka Marbisu SC, nangta ha ka por 1:45 baje mynsngi ka Umphrup SC kan aireng pyrshah ïa ka Mawryngkneng SC.
