Dang pyrkhat ka Sorkar ban pynïaid da ka PPP Mode ïa ka Tura Medical College : Conrad

Shillong, Nailur 11: U Myntri Rangbah ka jylla u Conrad K Sangma on Thursday u la ong ba ka sorkar ka dang ïaid da ka hybrid PPP (Public-Private Partnership) model ban pyntreikam ïa ka Tura Medical College, ka ban shah ïa ki private partner ban pynïaid ïa ka college katba ka sorkar ka bat ban pynïaid tang ïa ki civil hospital bad MCH.
“Ka la don ka jingpyrkhat bakla ba ki nongpynïaid ki riewshimet kin pynïaid ïa ka Tura civil hospital bad ka MCH. Nga pynthikna ba kam don ka jingkylli ba kin shimti halor ki kam shakri jong ka civil hospital bad MCH,” ong u Conrad haba jubab ïa ka jingïatai ba la wanrah da u Nongïalam ka liang pyrshah u Mukul Sangma hapoh ka ïingdorbar Thaw aiñ kaba u la pynpaw ka jingpyrshah ka sorkar ban ïatreilang bad ki riew shimet ban pyntrei bad ban pynïaid ïa ka Tura Medical College.
U Myntri Rangbah u la banjur ba ka sorkar ka buh eh hakhmat ban pynthikna ïa ka lad jingsumar kaba bha tam ïa ki paidbah.
U Myntri Rangbah u la pynpaw ruh ïa ka jingduna ki specialist ha Garo Hills, kaba haduh 50% ban kynduh ïa ka jingdonkam ki nongshong shnong ha ka koit ka khiah. “Ban pynïaid ïa ka medical college kan donkam bun ki nongtrei,” u la ong da kaba bynrap, “Kaba heh tam ka dei ha ki nongtrei namar ki briew kim mon ban wan watla ngi la long kiba la khreh ban siew.”
U Conrad u la pynthikna ba ka sorkar jong u kan plie lad bad ki riewshemphang ban ïasyllok bad ban ïakren ruh ka liang pyrshah ban pynïaid shakhmat ïa kane ka kam.
“Ngi don hangne ym ban shim noh jong ki hok jong baroh. Ngim don hanane ban leh da kabor, hadien ba la ïakren sani bha ngi la pynkut ba kane ka hybrid PPP mode ka dei ka lynti kaba bha ban ïaid shakhmat bad ngi plie ruh ka jingkhang ban ïasyllok bad ki dkhot bad ban pynïaid shmat ïa kane ka jingthmu,” u la ong.
U Myntri Rangbah u la kyntait ruh ïa ka jingpyrkhat bakla ba kito ki samla pule kin hap ban siew T. 50 lak haduh T. 1 klur ka jingsiew lada pyntreikam da ka hybrid PPP model na ka bynta ka Tura medical college.
U la pynshai ba ka tuition fee na ka bynta ka 63% ki seats ba la bhah da ka quota ka sorkar ki samla pule kin ïoh ka jingpynduna ka dor na ka sorkar naba kin hap ban siew noh tang T. 30,000. ïa nongpynïaid ki private partner yn sa shah ban shim ka fee na ka bynta ki 37% ki of seat ba dangsah, ka committee kan rai ka rukom shim ïa ka bai pule.
“Shah ïa nga ban kren da kaba shai na ka bynta kito ki 80 seats ne ki 63% ki seats,ba kam don ka jingkylli ïa ki briew ban hap siew T. 50 lak ne T. 1 klur na ka bynta ka tuition fee. Lada ka committee ka ong ba ïa ka fee dei ban siew T. 5 lak, ka sorkar kan pynduna sha ka T. 4.7 lak,” ong u CM.
Kham ha shwa haba jubab ka Myntri ka tnat Health ka kong Ampareen Lyngdoh ka la ong ba kane ka rai ban leit da ka hybrid ppp model la wanrah hadien ba la pyrkhat ïa ki jingshisha hapoh ki jaka treikam bad ki jingeh ban pynïaid ïa ka medical decision college.
Ka la kdew ruh halor ki jingkongsan ka jingduna ki nongtrei ba donkam ban pynïaid ïa ka medical college, naba donkam 97 ngut ki faculty member, hynrei tang 20 ki doctor ki la pynpaw ka jingmon ban shakri ïa kane ka college.
Ka la pynshai ba ka sorkar kan longtrai ïa ka khyndew bad ka jingtei katba ka private partner kan pynïaid ïa ka medical college bad hospital ban pynthikna ïa ka jinghikai kaba paka.
Ka la pynthikna ba ka sorkar kan rai halor ka fee structure, bad kan ym don ka jingshah buh jingkhia ïa ki samla pule kiba na ka state quota. Ka private partner kan pynlut ïa kaba pynïaid ïa ka medical college bad ban siew kabai wai T. 1 klur manla u snem.
“Ka sorkar ka long laitluid ban ïakren ha kane ka jingtyrwa bad ka kloi ban ïatreilang ban pynthikna ïa ka jingjop jong ka Tura Medical College,” ka la ong.