Shillong, Nailur 11: Ka ophis Additional Deputy Commissioner, i/c Sohra Civil Sub-Division, Sohra ka la pyntip ba na ka daw ba pynlongïa ka 4th International Sohra Half Marathon ka ban sdang ha ka 27 tarik mynta u bnai, ki surok na Mawkdok ban leit sha Sohra, Mawkma sha Shillong Sohra road, ka surok Laitmawsiang – Laitryngew sha Shillong- Sohra road, Dainthlen junction, Khliehshnong, Sohra ban leit sha Shillong- Sohra road, Laitkynsew – Sohra road lyngba ka Mawmluh bad ka Lad Sohbar- Sohra kin khang ban ïaid ïa baroh ki kali naduh ka por 5:00 baje mynstep haduh ka por 9:30 mynstep.
Baroh kiba leit jingleit, ki tourists, bad ki paidbah kiba thmu ban sha katei ka prokram ha ka 27 tarik la kyrpad ban kiar ban ïaid na kitei ki surok. Hynrei ïa ki kali kiba donkam kyrkieh kum ki ambulance, fire tender, bad kiwei ki lait na kane ka jingshah khang.
