Balei khlem khot lang por ba plie ïa ka Engineering College ba nyngkong ha ka jylla, ong u Dr. Mukul

Shillong, Nailur 11 : U Nongïalam ka Liang Pyrshah ha Ïing Dorbar Thawain ka Jylla, u Dr. Mukul Sangma u la buh jingkylli ïa ka sorkar ba kam shym la khot lang ïa u ha ka jingplie ïa ka Shillong Engineerning College khamtam haba kadei ka engineering college kaba nyngkong eh ha ka jylla.
“Nga da sngewsih shisha,” ong u Dr. Mukul haba kren ïa ka ishu Engineering College ha kane ka sngi Palei ha Ïing Dorbar.
Kumta, u la kyntu ïa ka sorkar jylla ba kadei ban khot lang ïa baroh khnang ba kin ïoh ban kmen lang halor kane.
Haba jubab halor kane, u Myntri Rangbah ka Jylla, Conrad K Sangma u la ïathuh ba u ruh ïalade u khlem shah khot ha katei ka sngi plie hynrei u kular pat ba kin sa pynlong da ka prokram kaba kham biang ban rakhe ïa kane ha kaba baroh kiba don bynta yn sa khot lang.
“Ïanga ruh khlem shah khot. Hynrei ka klas ka la ïaid. Ngim shym la don kano kano ka prokram kaba da pynbeit. Ïa ka jingtei la dep ban plie hynrei ngi khlem pat ïoh ïa ka jingmynjur na ka AITCE. Kumta, ngi kwah ban pynlong da ka prokram kaba kham biang khamtam haba kadei ka burom kaba khraw bha na ka bynta ka jylla baroh kawei ban ïoh ïa ka engineering college ba kan sdang ha ka jylla,” u la ong.
U Myntri Rangbah u ong ruh ba un pyntikna ba baroh kin sa shah khot lang na ka bynta katei ka prokram.
Haba bynrap lang, u Myntri ka tnad Pule Puthi ka sorkar jylla, u Rakkam A Sangma u la pyntip ba u ruh u khlem shah khot ha ka sngi sdang ïa kane ka Engineering College.