Shillong, Nailur 11: Ka jingïakhun ban rah ïa ka nam lahduh jong ka Shillong Premier League 2025 ka la nang itynnat hadien ba ka Laitkor ka la pynkyndit da kaba pynliem ïa ka Nangkiew Irat, kaba la ïalam hakhlieh duh ïa ka league, da 3-1 kol ha ka janmiet jong ka sngi Palei ha madan First Ground-SSA Stadium, Polo.
Ka jingïalehkai ka la long kaba shongshit haduh katta katta, ha kaba ka Nangkiew Irat ka ïoh ban lamkhmat nyngkong tang hadien 45 sekhon ba la sdang ka jingïakhun lyngba u Himanshu Patil (1’) tangba ka Laitkor ka la pynïakhaid lyngba u Batkyrshan Kharkongor (31’) bad lamkhmat kylla ïa ka jingïakhun na ka kol jong u Wadskhem Marbaniang (39’).
Ka bneng ka la sdang ban hap slap mar ïa bteng ïa ka kylla miet bad ka jingjur u slap ka la pynlong ïa ka madan ban shlei um, kaba la pynlong ïa ka jingïakhun kaba jwat na ka bynta ki rangïalehkai, hynrei u Felixdarren Suting (76’) u la lah ban pyndam syndon ïa ka jingkyrmen jong ka Nangkiew Irat ban wanphai, da ka kol kaba lai kaba la pynkmen ïa ki nongkyrshan kiba sakhi ïa kane ka jingïakhun ha madan.
Kane ka dei ka jingshah rem kaba nyngkong jong ka Nangkiew Irat ha kane ka samoi, hadien ba ka la jop lai sien bad ïakhaid kawei na ki saw tylli ki jingïakhun ba la dep. Ka dang ïai bat ïa ka kyrdan ba nyngkong ryngkat ki 10 poiñ ba ka la kamai hynrei ka lah ban shah knieh noh ynda ka Mawlai kaba don ha ka kyrdan ba ar (9 poiñ) bad ka Shillong Lajong (8 poiñ) kin ïakhun ïa ki jingïakhun ban wan. Ha kawei pat ka liang, ka Laitkor ka la kiew na ka kyrdan kaba 8 sha ka kyrdan kaba 5, da kaba ïaryngkat 7 poiñ bad ka Langsning hynrei da ka jingïapher kol kaba kham duna (+9 haduh +1).
Ka Nangkiew Irat ka la duh noh ïa ki katto katne ki rangïalehkai ba kongsan namar ka jingshah sospon, kum u Restom Khriam bad u Wallamsuk Nongkhlaw, kiba baroh arngut ki la ïoh ïa ka red card na ka daw ka jingïakynad ha kaba kut jong ka jingïakhun pyrshah ïa ka Rangdajied United shi taïew mynshwa.
Hynrei kane kam shym la long ka jingthut ïa ki namar ba u Himanshu u la ïoh ban buh hakhmat ïa ka kynhun da ka kol kaba la thep da ka khlieh lyngba ka bol pashat kaba la pynbuh na liang kamon. U rangapkol ka Laitkor, u Deranius Wahlang u la ïoh ban pyndei tiak da ka kti ïa ka bol hynrei um shym la lah ban khanglad ïa ka ban ïaid lait ïa u laiñ.
Ka Laitkor ka la pyrshang bun sien ban thep na jngai, ha kaba u Sandy Kharkongor, uba la nohsynñiang ha ka jingïakhaid kaba mar 2-2 bad ka Nongrim Hills ha ka Round 4, u la pyrshang lai sien ha ki 25 minit ba nyngkong. Hynrei ym don kawei ruh na kine ki jingpyrshang kaba la poi sha ka thong.
Khatduh khatwai ka Laitkor ka la sangeh ban pyrshang na jngai bad pyndonkam da kawei pat ka buit, bad ha ka jingtrei shitom jong ki ban pynjur ïa ki bol pashat hapoh phyllaw kol jong ka Nangkiew Irat, ka la ïoh ban pynïakhaid lyngba u Batkyrshan.
Tang hadien 8 minit ka Laitkor ka la lamkhmat kylla ïa ka jingïakhun, bad kane ka la wan lyngba u Samborwell Mynsong uba la mareh stet na ka liang kadiang. U nongap kol ka Nangkiew Irat u Surjay Kumar Pariyar u la mih ban khanglad ïa u hynrei une u rangïalehkai ka Laitkor u la pashat ïa ka bol sha kamon bad u Wadskhem u la syntuid na madan ban pyndei tiak ïa ka bol, kaba la tyngkhuh ïa u dieng kol shuwa ban rung shapoh.
Ka jinglong jingman ka la nang kham eh ban ïalehkai ha ka kylla miet bad ki referee ki la sangeh ban khmih bñiah ïa ka madan kumba shi kynta eiei namar ba ki don katto katne ki bynta kiba lang um. Hynrei baroh ar tylli ki kynhun ki long kiba la kloi ban ïaid shakhmat ha ka jingïalehkai.
Dei ynda la jam sha ka 76 minit ba ka Laitkor ka la pynskhem ïa ka jingjop lyngba ka kol jong u Felixdarren, kaba u la thep na ka corner kick.
Mynta ka sngi yn sakhi ïa ka jingïakhun hapdeng ar tylli ki kynhun kiba don ha ka thup kyrdan shah sloit – ka Malki kaba don ha ka kyrdan ba khyndai pyrshah ïa ka kynhun kaba don ha trai duh ka Nongrim Hills- ha ka por 4:30 janmiet.
