Shillong, Nailur 10 : U Myntri Rangbah ka Jylla Conrad K Sangma u la kular ba ka sorkar kan pyntikna ban peit ba ki nongshong shnong ba dei hok kin ym duh ïa ka hok bad ong ruh ba yn ym don mano mano ruh ki briew kiba nabar kiban shah kynthup pat ha ka thup ki nongthep vote ka jylla.
“Nga kwah ban pyntikna ba ngin pyrshang ban peit ba ki nongshong shnong ba dei hok kin ym shah pyndik bad kito ki bym dei ki nongshong shnong ka jylla kin ym shah kynthup ha ka electoral roll,” ong u Myntri Rangbah ka Jylla ha Ïing Dorbar Thawain ka jylla ha kane ka sngi Balang haba jubab halor ka cut motion.
U Myntri Rangbah u la ong ruh ba ka Proposed Summary Intensive Revision (SIR) jong ka electoral roll ka long ban peit ïa ki jingsngew kiba wanrah da ki dkhot bad ruh ban pyntikna ba ka electoral roll la pynthymmai bad lait na ki jingbakla, ki ID ba leh thok bad kiwei kiwei ki jingduna.
Nalorkata u Myntri Rangbah u la pyntip ruh ba ka SIR kan kynthup ruh naduh ka jingleit rung Ïing ha kaba man ki nongthrp vite kin hap ban ai ïa ka enumeration form.
Tangba la ong ba na ka bynta ki nongthrp vite kiba la register ha ka electoral roll haduh 01 Kyllalyngkot, 2003, ym donkam satia ban ai ïa ki kot ki sla.
U Myntri Rangbah u ong ruh ba ka SIR ka long kaba donkam ban peit ïa ki jingkylla kiba la jia ha ka jylla ha kine ki 20 snem ba la dep kynthup ïa ka jingkylla sor lut bad ruh ka jingjur ka jingphet shnong.
Shuh shuh u Myntri Rangbah u la kular ruh ba ka sorkar kan pynbiang ïa ki jingai jinghikai sha ki Booth Level Officers (BLOs) ban pyntikna ba la pynkupbor ïa ki ban pynlong ïa ka SIR ha ka rukom kaba paka.
U ong ba kane ka jingai jinghikai kan kynthup naduh ka jingbatai haba ïadei na ka jingleit na kawei ka ïing sha kawei pat, ka jingpynshisha ïa ki kot ki sla bad kiwei kiwei.
Na ka liang u Myntri Rangbah u la ong ba u sngewthuh ïa ka jingsngewkhia jong ki dkhot ka Ïing Dorbar shaphang ki jingeh ba ki nongshong shnong ki kynduh ha kito ki jaka ha kaba ïa ki kot ki sla kim lah ban pynbiang lypa.
Kumta, u kular ba sorkar kan treilang bad ka ECI ban ïoh ïa ki lad ki lynti na ka bynta kine ki ishu bad pyntikna ruh ba ki nongshong shnong ba dei hok kin ym shah pyndik ne shah pynduh ïa ka hok jong ki.
