Shillong, Nailur 10 : U Myntri Rangbah ka jylla u Conrad K Sangma ha ka sngi Balang u la pyntip ha ka Iing Dorbar ba ka sorkar jylla ka la thaw ïa ka jaka ba ki paidbah ki lah ban ujor kaban pynbeit ïa ki jingeh halor ki jingujor kiba ïadei bad ka tnad bording lyngba u helpline number – 1971.
Haba jubab halor ka jingkylli kaba ïadei bad ka jingbym don ka jaka ba ki paidbah ki lah ban ujor ban peit bad pynbeit ïa ki jingeh ba ki kynduh, u Myntri Rangbah u la ong ba kane ka rukom treikam ka dei online bad ki paidbah ki lah ban ïoh ïa ka jingshakri da kaba shu call ha u number 1971 naduh ka por 8:00 baje mynstep haduh ka por 8:00 baje janmiet.
Shuh shuh u la ong ruh ba ïa ki jingujor ki paidbah ki lah ban phah la ka long ha ka ktien lajong ne wat ha ka ktien nongwei ruh.
La pyntip ruh ba u Joint Secretary-in-charge u dei ruh u nodal officer, bad kumta baroh ki jingujor la peitngor da ka ophis treikam jong u Myntri Rangbah ne ka Chief Minister’s Office (CMO).
La ong ruh ba kane ka rukom treikam ka dei kaba pynïasoh lang bad baroh ki tnad sorkar ban pyntikna ban ïoh pynbeit ha ka por kaba biang halor ki jingujor.
U la ïathuh ruh ba ka system ka ïoh pdiang daki hajar tylli ki call bad kumba 1000 tylli ki dei beit kiba ïadei bad ka tnad bording marwei.
U la ong ruh ba na kine, 90 persen ki jingujor kiba ïadei bad ka tnad la dep ban pynbeit bad bun na kine ki ishu ki dei beit bad ka jingduh ki transformer bad ka jingthut ka bording.
“Nga kyntu ïa ki dkhot ba u 1971 u dei u nombar bad uno uno u lah ban phone bad pyntip ïa ki jingeh jong phi bad kylli ruh shaphang ki skhim sorkar,” ula bynrap biang.
