Nongpoh, Nailur 10: Haba kren ha kawei na ka jingïalang jong seng ha ka jingplie paidbah ïa ka ophis treikam ka Ri Bhoi Unit mynta ka sngi ha Byrnihat, u Bah Mosklander Marngar kum u President ka Meghalaya Commercial Trucks Owners and Drivers Association (MCTODA) u la ther tyngeh ïa ka sorkar jylla halor ka jingshah ktah ki khun samla ha ka liang ka ioh kam ka ioh jam, ha kaba bun na ki kam ki jam la knieh da ki briew kiba na shabar ka jylla.
U la ong ba ka Meghalaya Commercial Trucks Owners and Drivers Association ka ai ka ïa ka jingkyrshan kaba pura ïa ka All Khasi Meghalaya Tourists & Taxi Association, kaba la mih ban ïa khih paidbah ban dawa ïa la ka hok, namar wat ïa ki kam kamai kajih lyngba ki Kali la knieh da ki bar jylla.
“Ngi pdiang ïa baroh ki Kali Tourist kiba wan ha ka jylla, hynrei ka sorkar ka dei ban buh noh kawei ka jaka bad na katei ka jaka ai ba ki samla kin ioh kam ioh jam ban kit ïa ki nongjngohkai pyrthei” ong u Bah Marngar bad kumba long mynta jan baroh ki kam la ioh jingmyntoi da ki kali kiba na shabar ka jylla namar ka sorkar kam kitklieh ïa ka jingeh ki khun samla kiba shong khlem kam khlem jam” u la bynrap.
U la ther tyngeh ruh da kaba ong, jan baroh ki jaid kam la knieh jyndat da ki bar jylla katba ki trai jylla ki hap ban shong khlem kam khlem jam bad ong ruh naduh ki Kali heh haduh ki Kali rit la wan ban kamai da ki kali kiba na shabar ka jylla katba ki trai jylla pat ki hap ban shong khlem kam khlem jam. U la ong ruh ka dei hok ba ka seng AKMTTA kan ïa khih namar ki trai jylla kim ioh kamai bad ki ba nabar ka jylla pat ki wan kamai suk ha kylleng ki jaka jong ka jylla.
Shuh shuh, u la ther tyngeh ruh ïa ka sorkar kaba ym don ka jingkitkhlieh namar ha jan baroh ki kam kamai la knieh da ki briew kiba na shabar ka jylla naduh ka tih dewiong, ka tih mawshun, ka kamai paidbah bad kaei kaba leh ki trai jylla pat ka sorkar kam ju pyrkhat bniah da kaba ai nuksa ruh kum ka CM elevate ka sorkar ai ram ban thied kali bad lada thied kali pat da ei ki samla kin siew ram haba ym don kata ka jingkamai, u la bynrap.
