Pynsngewthuh ka DMHO kumno ban ïada na ka jingdkhat jubor ïa ka jingim
Mawkyrwat, ‘Nailur 10 : Ha ka jingrakhe ïa ka World Suicide Prevention Day 2025 ha ryngkat ka phang “Changing the Narrative on Suicide”, ka ophis treikam jong ka District Mental Health Programme (DM&HP), South West Khasi Hills District kaba hap hapoh ka jingpynïaid jong u District Medical & Health Officer (DM&HO) ha ka jingïatreilang bad ka ophis jong u Superintendent of Police, ka District Legal Services Authority (DLSA), ka Jingïaseng Kynthei Mawkyrwat Presbytery bad ka Adolescence Friendly Health Clinic (AFHC), South West Khasi Hills District ka la pynlong ïa ka Panel Discussion ha Community Hall Mawkyrwat, South West Khasi Hills District.
Ïa ka Panel Discussion la pynïaid da ka Kong (Dr) Belinda Marwein, Vice Principal, Sngap Syiem College ryngkat ki nongpanali (panelists) ki kynthup ïa u bah B. Jyrwa, MPS, Superintendent of Police, ka kong A. Nongsiej, Deputy Chief Legal Aid Defence, u Pastor L.E. Jyrwa bad ka kong A. Lyngkhoi, Clinical Psychologist, DMHP, South West Khasi Hills District. U Dr. F.R. Lartang, DM&HO, South West Khasi Hills District u la don ryngkat ha ka prokram bad u la ai ruh ïa ka jingpynshai halor ka phang pdeng ba ïa dei bad kane ka sngi ba kyrpang.
Ka jingbatai halor ka phang, ka la pynpaw shai ïa ka jingdonkam ban pynkylla ïa ka rukom pyrkhat bad kren shaphang ka jingpyniap lade. Ki la kdew ruh ïa ki lad kumno ban pynduh ïa ka jingniewbeiñ ne jingjynjar mynsiem ïa kiba don ha ka jingeh bad kiba pyrkhat ban shim noh ïa la ka jingim.
Ym tang kata, la hikai ruh ba ngi dei ban kloi ban wad jingïarap ha ka por ba ngi shem jingeh lane jingjynjar ha ka jingim, namar bunsien ka imlang sahlang ka pynlong ïa ki briew ban kun jingeh ha ka jingmut haduh ba kim lah shuh ban teh lakam ha kaba ka pynlong ïa ki briew ba kin don ka jingmut ban shu pynïap noh ïa lade. Kumta ka jingpynkylla ïa ka jingmut jingpyrkhat bad ka jinglong kloi ban wad jingïarap ka long ka lynti ban ïada na kane ka jingeh.
Ha ka jingïaid ka Panel Discussion, ki nongpanali ki la ïathir jingmut halor ka phang bad ki la ai jingpynshai ïa ki jingkylli ba wan na ki nongwan shim bynta (participants) kiba ïadei bad ka ki lad kumno ban ai jingïada ne ïarap ïa ki briew khnang ban lait na ka jingpynïap lade lane suicide.
Kiwei de kiba la ïa donlang ki long naduh ki 130 ngut ei ei delegates ba la shah khot sngewbha na ki Balang, ki nongkitkam jong ka Jingïaseng Kynthei Mawkyrwat Presbytery, ki nongtrei hapoh ka ophis jong u District Mental Health Programme (DM&HP), South West Khasi Hills District lem bad kiwei de.