Kitkhlieh lang ban khanglad ïa ki briew kiba sngew kutlad ban shim ïal a ka jingim

Nongpoh, Nailur 10: Ban ai jinghikai bad jingtip halor ka jinglong jingman jong ka jingim bad khamtam ban ïada ïakiba bun ki mynsiem kiba thmu ban shim noh ïaka jingim lade, ka ophis jong ka District Medical and Health Officer (DMHO), lyngba ka District Mental Health Programme mynta ka sngi rakhe kyrpang ïa ka ‘World Suicide Prevention Day’ ryngkat ka thong ban kyntiew jingmut jingpyrkhat bad ban ai jinghikai kumno ban pynduna ïa ki jingjia ba sngewsih haba bun ki mynsiem ki la kut lad da kaba shim noh ïa la ka jingim.
Ka jingrakhe ïa kane ka sngi la sdang da ka jingïaid paidbah jong ki khynnah skul, kaba la sdang na Nongpoh Town Shopping Complex bad pynkut ha Parish Hall, Nongpoh, ha kaba la long ruh ka jingïathir bad tai sani (Panel Discussion) halor ki lad ban ïada na ka jingthmu ban shim ïa ka jingim halor ka phang “Changing the Narrative on Suicide – with the Call to Action.”
Ha kane ka sngi, haduh 7 ngut ki nongkren na ki tnad bapher bapher ki la shim bynta ban ai jinghikai bad jingsneng jingkraw ïa ki paidbah ba kynthup ïa ka Dr. Andrecia Mawiong, Assistant Professor na Shillong Medical College, Orville Masar, ASP ka Ri Bhoi, Bah S.B Blah, District School Education Officer, Kong Lamjingshai Peter Lyngdoh, Counsellor ka DCPO Ri Bhoi, Kong B. Marai, Assistant Legal Aid Défense Counsel ka Ri Bhoi haka jingdonlang ki ophisar naka tnad ka koit ka khiah, ki samla pule, ki khynnah skul lem bad ki nonghikai.
Ka jingrakhe ïa ka World Suicide Prevention Day ha Ri Bhoi ka dei ka dak ban pynkynmaw ba ka jingim ka long kaba kordor bad ba baroh ki dei ban long kiba kitkhlieh ban ïada na ki jingjia ba sngewsih kiba ktah ïa ka imlang sahlang, namar bunsien tang na kidaw ba rit bad ym don kiba kren ne kiba syllok bun ki khynnah wat ki rangbah ki shim noh ïala ka jingim ka bym long satia ka lynti kaba dei.