Khliehriat, Nailur 10: Ka tnat District Mental Health Programme (DMHP), East Jaiñtia Hills District mynta ka sngi ka la pynlong ïa ka World Suicide Prevention Day 2025, ïa kane ka prokram ba kyrpang la pynlong ha Khliehriat West Community Hall, Khliehriat
Ha kane ka prokram ka la don ka jingïatai ne ka jingiaphylliew jingmut ha kaba ïadei bad ka daw kaba ialam ïa ki riew shaduh u pud ban pyniap ïalade bad la ïakren ruh halor ka phang kaba ialam ïa ki riew haduh u pud ban shah ktah ia ka bor jingmut jingpyrkhat, ïa ki dak ki shin kiba paw shaar lada u ne ka riew ki don ka jingpang ha ka bor pyrkhat, ka daw ba lam sha ka jingkyrni dih drok haduh ba kin da shim iala ka jong ka jingim, la ïakren ruh halor ki lad ai jingïada, ki kyndon aiñ na ka bynta ban ïada ïa kito ki briew kiba shah ktah ha ka bor jingmut jingpyrkhat.
Haba kren ha ka jingïalang, u District Malaria Officer, East Jaiñtia Hills District, u Dr C.S. Bareh, u la kren halor shibun kiei kiei kiba ktah ïa ka bor jingmut jingpyrkhat kaba lah bna lam shaduh u pud ban pyniap ïalade, u kren ruh halor ki dak ki shin kiba paw kiba donkam ban peit bha bad bishar bniah ïa u ne ka briew khnang ban lait na kano kano ka jingthmu jong u/ka briew ban pyniap ïalade.
Ha katei ka jingïalang ba la ïa don lang ki khynnah skul, u Dr C.S.Bareh u kyntu jur ïa ki khynnah skul ba kim dei ban shu sngap jar lada ki don kano kano ka jingeh ha ka jingim jong ki ne ha ka jingmut jingpyrkhat, hynrei ki dei ban iathuh ha kiba la heh la san bad lada ki iathuh ïa ki jingeh kane kan iarap ban pyn sting ïa ka jingmut jingpyrkhat jong ki bad ruh kiba la heh la san kin wad ki lad ki lynti ban ïalam sha ki jaka ban iasyllok ne sha ki Psychiatric Care bad lah ruh ban iarap ïa ki ha ki jaka iasyllok lyngba ka District Mental Health Programme (DMHP).
U Medical & Health Officer in-charge Opioid Substitution Therapy (OST) Centre, Khliehriat, u Dr. J. Nongtdu u la batai katto katne ki daw ba kiba dih drok ki ju poi sha u pud ban pyniap ïalade bad kawei kaba ktah ïa ki ka dei ka jingsngew ne ka emotional kaba kim lah ban skhem jingmut, ka jingshah shukor, ka jingiadei bad kine ki dei ki daw kiba kongsan kiba lam ïa ki sha u pud ba kin pyniap ialade.
Haba kren halor ka phang ba ïadei bad kane ka sngi World Suicide Prevention Day, u la ong ba ha kino kino ki jingeh ba ki iakynduh ki dei ban tip ba u drok bad ka kyiad kin nym lah ban weng ïa ki jingeh na ka jingim bad u la batai ruh ïa ka jingktah u drok ha ka jingim jong kito kiba pyndonkam drok kaba la ktah pynban ïa ka bor pyrkhat.
Ka Additional Public Prosecutor (Panel Lawyer), District Legal Services Authority (DLSA), East Jaiñtia Hills District, ka kong Melody War ka la batai ïa ka Mental Health Care Act 2017 bad ka la kren ruh halor ka jingbym shim khia na ïing na sem ka lam sha u pud ban shah ktah ha ka bor jingmut jingpyrkhat bad haduh ban da pyniap ialade bad ka la ban jur ruh ïa ka jingdonkam ban pynlong bun ki prokram ai jingpynshai ne ki awareness prokram ban iada bna lait na ka jingpyniap ialade.
Katei ka muktiar, ka kong Melody War ka la pynshai ruh halor ki bynta jong ka District Legal Services Authority (DLSA) ha kaba iadei bad ki lad jingiada bad kyrshan ïa kito ki briew kiba don ka jingshah ktah ha ka bor jingmut jingpyrkhat.
Hadien ka prokram ba la pynlong hapoh hall bad kum ka dak ka jingrakhe ïa kane ka sngi la pynlong ruh ïa ka jingïaid rally kaba naduh Khliehriat West Community Hall, sha madan Futsal sha Khliehriat East bad phai biang pat sha Khliehriat West Community Hall.
Kiba la ïa don ryngkat lang ha kane ka prokram ki kynthup ruh u District Programme Manager (DPM), National Health Mission (NHM), East Jaiñtia Hills District, u bah A. Dhar, District Mental Health Programme (DMHP) Psychiatric Social Worker, Civil Hospital, Khliehriat, ka kong. Thaiwan Kyndiah, ki nongtrei kiba na ka ophis jong u District Medical & Health Officer, East Jaiñtia Hills District, ki nonghikai, ki khynnah skul bad kiwei kiwei.
