Shillong, Nailur 10: Ka Sawmer ka la pynkyndit da kaba pynliem ïa ka Rangdajied United da 1-0 kol ha ka jingïakhun ba nyngkong jong ka kylla kaba san (Round 5) jong ka lympung Shillong Premier League 2025 ha madan First Ground-SSA Stadium, Polo, hynne ka sngi Balang.
U Khainkupar Iawphniaw u la mih madan kum u nongbujli (substitute) uba la thep ïa ka namtam ha ka minit kaba 63 jong ka kylla miet kaba la rai ïa ka nam jop jong ka kynhun.
Lah ban ong ba ka Rangdajied kaba la mad ïa kawei na ki samoi ïalehkai kaba duna bha hadien ba kam shym la lah ban thep kol ha ka sien kaba lai ha ki san tylli ki jingïalehkai. Ha baroh ki jingïakhun ba ladep ka la ïoh ban thep tang ar sien, kawei na kine ka dei ka kol ba la kum bakla thep hi (own goal).
Na ka bynta ka Sawmer, kane ka dei ka jingkylla kaba khraw ha ka rukom ïalehkai – ka la pynliem ïa ka Nongrim Hills kaba don ha trai duh jong ka miej ha ka 20 tarik u Nailar hynrei ka la mad ïa ka jingshah rem kaba jur ha kiwei pat ki jingïalehkai jong ka. Kadei ka jingïalehkai kaba nyngkong ba ki la khur ïa ka jingjop kaba paka khlem da shah thep (clean sheet) ha kane ka samoi hadien ba ki la shah thep jan 4 kol ha kawei pa kawei ka jingïalehkai ha ki saw tylli ki jingïakhun ba la dep.
Watla katta, ka Sawmer kam shym la duna ha ki kol, namar ba ka la thep 7 kol shuwa kane ka jingïakhun (kaba san ha ka jingbun kol ha ka league), bad ka la jan ïoh thep ar sien ha ka kylla step, ha kaba ka jingpyrshang jong u Bickyson Kharkongor ka la shah pynkiar noh sharud da u rangïalehkai ba shadien na u laiñ, katba kawei pat jong u Rijied Sunn ka la tyngkhuh ïa u dieng kol tang shuwa ban kut ka kylla kaba nyngkong. U nongapkol ka Rangdajied u Kerichard L Marshillong ruh u la shah pynbor ban khanglad (save) ïa ka jingpyrshang thep kol ha ka minit kaba 24.
Kumjuh ruh, na ka liang jong ka RUFC, ka la jan ïoh ban lamkhmat hynrei u rangïalehkai ba shadien jong ka Sawmer u Mebanjop Warjri u la ïoh ban pynkynriah noh ïa ka bol na u laiñ kol ha ka por kaba biang. Nangta ka jingpyrshang thep da ka khlieh jong u Benny Khriam ka la leit beit beit sha u nongap kol ka Sawmer u Pyrshangbanbha Dkhar.
Dei tad ynda la jam sha ka kylla miet ba ka jingtrei shitom jong ka Sawmer ka la sei ïa u soh. Haba ïohlad ban jam shakhmat, kane ka kynhun ka la pynjur ban ñion ïa ka Rangdajied hapoh ka phyllaw kol (box) da ka jingthmu ban pashat ïa ka bol na ka liang kamon. Khatduh ka bol la poi sha u Khainkupar ha ka liang kadiang, uba khlem shah pahara bha da ki nongïalehkai ba shadien jong ka RUFC. Watla u Denelson Pyngrope u la ïoh ban pyndei tiak da ka but hynrei u Khainkupar u la pyrshang kham tyngeh ban pynthikna ba ka bol kan rung sha kol.
Ka kabu ba bha tam jong ka Rangdajied ka la wan ha ka minit kaba 73 ha ka por ba u Pyrshangbanbha u khlem shym la lah ban pyrkhing bha ïa ka free-kick. Kane ka la ailad ïa u Micky Marwein ban ïoh pyrshang thep hynrei ka la bol ka la riew jraiñ ïa u nongap kol bad ka la kiar noh sharud na ka bynta ka corner kick.
Ka jingjop ka la pynlong ïa ka Sawmer ban kiew katto katne ki kyrdan sha ka kyrdan kaba san ha ka miej – mynta ki la kamai 6 poiñ. Katba ka Rangdajied ka la hiar sha ka kyrdan kaba hynñiew na ki 10 tylli ki kynhun da kaba kamai 5 poiñ.
Mynta ka sngi, ka kynhun kaba ïalam hakhmat duh ïa ka league, ka Nangkiew Irat kan ïakhun pyrshah ïa ka Laitkor kaba wan ha ka kyrdan ba 8 ha ka por 4:30 janmiet.
