Leit ai mynsiem ka KSU ïa ki khynnah Under-17 ka North Liberty HSS, hashaw ban leit ïakhun sha Delhi

Jowai, Nailur 10: Ka Khasi Students’ Union West Jaiñtia Hills District Unit hapoh ka jingïalam u Sport Secretary KSU West Jainñtia Hills District Unit samla Platini Mukhim, u General Secretary samla Leningrad Tariang bad kiwei ki nongïalam ka District haka jingdon ryngkat u Principal North Liberty Higher Secondary School bad Head Coach bah Dapmon Tariang hynnin ka sngi 9 tarik ka la ïoh ban leh burom bad ai mynsiem na ka bynta ka jingjop donburom ka North Liberty Higher Secondary School Jowai ha ka State Level Subroto Mukherjee Cup 2025 bad kitbok kitrwiang ruh ïa ki na ka bynta ba kin sa mih pat na kane ka jylla ban leit ïa shim bynta sa ha ka Under-17 Subroto Mukherjee Cup 2025, ka ban sa long ha nongbah Delhi.
U General Secretary ka KSU WJHDU ula ai jingsneng jingkyntu ïa ki players ba ki dei ban don ka mynsiem ïatreilang khlem da khwan burom ïalade bad shañiah iwei ïa iwei pat bad kumjuh u kyntu jur ïa ki ba kin kiar raimaw raidieng na u drugs uba long u jingdih uba pynjot thiaw ïa ka jingim bad lawei jongki kum ki samla ka Ri khnang ba kin nangkiew shaphrang ha ka sap ïalehkai kaba U Blei Nongbuh Nongthaw u la kyrkhu ïaki kaba long ka sap ka ban wanrah burom ym tang ïalade hynrei ïa ka jylla kumjuh.