Shillong, Nailur 08: U Myntri Rangbah ka jylla u Conrad K Sangma ha ka sngi Nyngkong u la wanrah ïa ka Meghalaya State Language (Amendment) Bill, 2025.
Haba wanrah ïa kane ka bill hapoh ka Ïingdorbar thaw aiñ ka jylla ha ka sngi sdang jong ka dorbar Synrai u Sangma u la ong ba ka jylla Meghalaya ka la ïoh sa ïa kawei pat ka district kaba thymmai ka Eastern West Khasi HIlls. Ki Khasi hapoh kane ka District jong ka Eastern West Khasi Hills ki pyndonkam ïa ka ktien Khasi. Kumta ka long kaba kongsan ban pynkylla ïa ka kyndon kaba 4 jong ka Meghalaya State Language Act, 2005 ban lah ban kynthup ïa katei ka district kaba thymmai.
U la ong ba namar ka jingbym lah ban pynlong ïa ka Legislative Assembly, u Lat ka jylla u la pynmih ïa ka Meghalaya State Language (Amendment) Ordinance, 2025 kaba la wanrah ka jingkylla ha ka kyndon kaba 4 jong ka Meghalaya State Language Act, 2005 hapoh ka Article 213 (1) jong ka riti synshar jong ka ri India.
“Kumta katei ka Ordinance ka donkam ban wanrah da ka Bill, kaba la ai kyrteng da ka Meghalaya State Language (Amendment) Bill, 2025,” u la bynrap.
