Shillong, Nailur 08: Ka Meghalaya Indigenous Tribes Constitutional Rights Movement (MITCRM) ka la buh ka jingkylli ïa ka jingtyrwa jong ka sorkar ban siew tulop ïa ki 3 tylli ki autonomous district council (ADCs) bad kyrmen ba kane kan ym ïalam sha ka jingwanrah ne pynjari ïa ka Panchayati Raj system ha Meghalaya.
Kane kadei kawei na ki mat ba ka MITCRM ka pan ka jingpynshai na ka sorkar jylla hapoh ki 15 sngi.
Ha ka shithi ba la aiti sha u Myntri Rangbah ka jylla u Conrad K Sangma ha ka sngi Nyngkong ka MITCRM ka la ong, “Ngi kyrpad ïaphi ban ai lem ïa ki jingtip kiba bniah haba ïadei bad kane ka kam hapoh ka 15 sngi, khnang ban lah ïa ngi ban tip halor kane ka kam.”
“Kumno ka sorkar ka lah ban pynthikna ba kane ka lad jingïarap kan ym lah ban wanrah ïa ka Panchayati Raj system ha Meghalaya, kaba lah ruh ban wanrah ka jingkylla ha kaba ïadei bad ki kam synshar ki trai ri trai muluk,” ka la ong da kaba banjur ïa ka jingdonkam ban ri sumar ïa ki hok bad ka kolshor jong ki jaitbynriew Khasi, Jaiñtia, bad Garo, bad kiwei ki rit paid.
Na ka liang ka MITCRM ka la pan ruh ka jingpynshai ba kumno ki ADC ki lum ïa ki khajna bad ha kano ka rukom ba ki la bhah ïa ki khnang ban wanrah ka jingtreikam kaba khuid bad kaba ym lah ban pyndonkam bakla.
“Hangno ki khajna kiba la lum da ki ADC ki don kum ka jinglum khajna na ki khyrdop bad kiwei ki tyllong khnang ban lah ban ïarap ha kaba ïadei bad ki kam siew tulop? Ngi kyrpad ïa ka jingtip kaba shai ha kaba ïadei bad kane kam siew tulop bad kumjuh ruh halor kiwei ki kam kiba ïadei bad ki ADC kaba ki lah ban kyrshan hi dalade naduh ba la seng ha ka snem 1952,” ka la ong.
