Sdang julor u surok Umrit-20 mer ba jur ka jingïaid ki kali kit khia haka por mynmiet, mano ba donkti?

Nongpoh, Nailur 08: Ka jinglaitlan bad ka jingïaid beaiñ jong ki trok kit khia man la ka miet na u surok Patharkhmah ban mih sha 20 mer Pahammawleiñ kala pynjot ïa kiba bun ki bynta jong u surok ba dang shu dep siang rong shen bad pynitynnad bha, ha kaba ym lah ban tip mano ba donkti ha katei ka kam watla kala ju don ka jingud jingnam naka por shaka por naki paidbah bad wat ki nongïalam shnong bad wat naka liang ka sorkar lyngba ka bor district haki snem bala leit kala pynmih ruh ïaka hukum ban khanglad ïaki trok kit khia namar ka jingma bad synjor ruh ka jingkieng lailad kaba la shah ban ïaid tang ki kali ba hapoh 9 ton.
Lah ruh ban pynkynmaw ba dang shen ka kynhun jong ki nongïalam shnong hapoh ka Raid Sohkhwai kala leit ruh ban ïakynduh ïa u DC ka Ri-bhoi ha kaba ïadei bad ka jingjur ki trok kit khia kiba wan naka thaiñ Patharkhmah khamtam haka por mynmiet, kaba la buh jingma ïaki paidbah nongleit nongwan naka jingrit u surok, bad pynjot ruh haka juh ka por ïa u surok, hynrei kitei ki trok kim salia satia ban pynkheiñ ïaki kyndon nalor ka jingkit beaiñ ïaki mar khamtam u rnga, bad kiwei kiwei wat hadien ba ka sorkar kala khang pyrshah ban ïaid kali kit khia na utei u surok.
Hynrei ka jingkylli ka mih mynta mano ba donkti ha katei ka kam beaiñ? Bad balei ka sorkar kam shimkhia ban tehlakam ïaki kali kit khia kiba ïaid lyngba utei u surok bad wat ka District Council ban tehlakam ïa kitei ki trok kiba kit beaiñ kiba ïaid sahuh man la ka miet nakhmat ka khyrdop jong ka, kaba don ha Lailad? Namar ka jingeh hi dei ki paidbah kiba mad kumba utei u surok u la long shisha ka jingkyrkhu ïaki paidbah hadien phew snem ka jingap khmih lynti, hynrei kan long biang ka jingtim ïaki paidbah ka thaiñ Ri-Bhoi Sepngi lada kitei ki trok ki dang bteng ban ïaid man ka miet bad ym don satia ba tehlakam.
Hadien ka jingbun ka jingujor bala ioh naki paidbah ka seng HNYF Northern Region hapoh ka jingïalam u Bah Alfred Malai General Secretary bad ki nongïalam ka HNYF 20 mer Circle hapoh ka jingïalam u Vincent Sylliang General Secretary, George Tangsang Adviser kila leit ruh ban jurip ïa utei u surok ba lap ba bun ki bynta kila sdang ban jot bad ka jingdon ki jingtwa khyndew ha kiba bun ki bynta kaba long shisha ka jingma ïaki paidbah ba leit ba wan.
Halor katei ka jingïaid sahuh ki trok kit beaiñ kiba kit palat pud ïaki mar naka liang ka seng kala leit ruh ban ïakynduh bad ki bor district ka Ri-Bhoi ban ujor halor katei jingeh ba ki paidbah ki ïakynduh bad ruh ka jingsdang ban jot u surok naka jingïaid ki trok kit khia ba kidei ban pynsangeh mar dor ba kim dei shuh ban ailad ïaki trok ban dang bteng ban ïaid na utei u surok bad ban leh ruh da kaba tyngeh pyrshah ïaki trok kiba pynkheiñ aiñ, khnang ba utei u surok un neh naka bynta ka jingbit jingbiang bad ka jingsuk ki paidbah haka leit ka wan.