Shillong, Nailur 08 : Ka Dorbar Shnong Mynriang East Khasi Hills District ka la pynpaw ïa ka jing sngewkhia halor ka jingkynrei ki jing sniew khamtam ka jing jyllei u drok hapoh Nongbah Shillong bad wat ha ki Nongkyndong ruh mynta ula suhthied bad ïoh jaka.
Kumta na ka liang ka Dorbar Shnong ha ka step sngi Saitjain ka la lum ïa ka Dorbar ban ïa pyrkhat ban ïa thir ban ïa tai kumno ban leh bad teh lakam ïa kine jing sniew ki ba la buh jing ma ïa ka imlang sahlang wat haba ka Shnong Mynriang ka kham pajih na Nongbah Shillong.
Katkum ka kyrwoh ba la phah da u Bah JJ Lyngkhoi Secretary Shnong Mynriang, East Khasi Hills la ïathuh ba ka Dorbar ka la iatai sani ruh ban khanglad katba don la ka bor ïa u drok ba un ïoh rung shapoh ka shnong ka thaw.
“Ha kane ka Sngi ka Shnong Mynriang ka la pynpaw ïa ka jing sngew khia ka bajur ïa kine ki kam sniew ki ba la leh donbor ha ka imlang salang bad ki ba la buh jing ma ruh ïa ka ïaid ka ieng jong ki kynthei khynnah bad ki briew baroh. Kumta ka Dorbar Shnong Mynriang ka la mana bad kyntu ïa ki briew ki ba wan na bar Shnong kin sngewbha ban pyntip ha ki Nongïalam Shnong khamtam ha ka por miet por iong kim dei ban ïaid laitlan khlem kino kino ki kam ki ba shongnia bad ba donkam,” ong ka kyrwoh.
Ka la kyntu ruh ïa ki nongkhwai ha wah Umkhen Umtung ba lada ki wan khwai kim dei pat ban leh ïa kino kino ki kam sniew hynrei tang ban shu wan khwai beit.
Ka Dorbar Shnong Mynriang ka la mana ruh ia kino kino ki kali ba kim dei ban rung ban mih klumar hapoh shnong khamtam ha ka por miet por iong.
“Kumba ngi la ïoh ïa ka jing jia ha ka Shnong Mawryngkneng ba la don ki kali ki ba wan ïaid ha poh shnong bad ka kah dur khmat ban wan tyrwa jing bam ia ki khynnah skul. Kumta kane ka jing jia ha Shnong Mawryngkneng ka long ka nuksa ïa ngi ki Dorbar Shnong Mynriang ba ngin pyrkhing bha ïa ki jing wan rung ki kali ki bym ithuh ithaw shuh ka ba la buh jing ma ïa ka imlang salang.”
Shuh shuh la pynpaw ruh ba na ka liang ka Dorbar Shnong Mynriang ka kyntu ruh ïa ki Nong Shong Shnong ban ai ka jing ïa trei lang bad ki Nongïalam Shnong halor kane ka bynta. Ha kajuh ka por la kyntu ruh ïa ki kmie ki kpa kin da ïa peit bha ïa ki khun ki kti bad lada lap ïa kino kino ki kali ba i pher ne ki briew ba i pher ba ki dei ban pyntip mardor sha ki nongïalam shnong.
