Shillong, Nailur 08: U Lamphang ka Ïingdorbar Thaw aiñ ka jylla u Thomas A Sangma u la ong ba ki la don ki jingpyrshang ban pynsted ïa ka kam bad kumjuh ruh ban kyrpad ïa ki contractor ba kin pyndep kloi ïa ka jingtei jong ki bynta ba shapoh jong ka Ïingdorbar kaba thymmai.
“Ki jingtei jong ki bynta kiba shapoh jong ka Ïingdorbar ka la sdang bad ngi la kyrpad ruh ïa ki ba kin pynsted ban pyndep kloi ïa ka kam bad ba kin trei ruh khlem sangeh. Nga la kyrpad ïa ki ba kin pyndep kloi ïa ka kam katba lah ei,” u la ong haba ïakren bad ki lad pathai khubor.
U Lamphang u la ong ruh ba ki don kiwei pat ki kam kiba dei ban shim khia ba kynthup ïa ki acoustic, ki jingshngaiñ, bad ki audio-visual wiring. Ki la don ki kam ha kaba ïadei bad ka jingbuh ïa ki CCTV camera bad kiwei pat ki kam kiba donkam ban buh ha kane ka jaka.
