Shillong, Nailur 08: Da ka jingïalehkai kaba khlaiñbor ka Mawlai ka la lah ban jop da kaba pynjemkhnap ïa ka Malki da 5-1 kol ha ka jingïakhun ïa ka lympung Shillong Premier League 2025 kaba la long ha madan First Ground-SSA Stadium, Polo, hynne ka sngi Nyngkong.
U Loving Suting (18’, 30’) u la noh synñiang da kaba thep ar kol na ka bynta ka Mawlai, ki lai tylli kiwei pat ki kol la thep da u Robert Khongriah (27’), u Fairming Suting (31’) bad u Kevin Rymbai (48’), katba u Damutlang Wahlang (45’+4) u la pynkhih ïa ka shi kol na ka bynta ka Malki.
Kane ka jingjop ka la rah biang ïa ka Mawlai sha ka kyrdan kaba ar da kaba kamai 9 poiñ na ki saw sien ïakhun. Ka Malki ka dang sah ha ka kyrdan kaba 8 da kaba kamai 3 poiñ na ki saw tylli ki jingïakhun.
Kane ka jingïalehkai ka la la sakhi ïa san tylli ki kol kiba la lah ban thep tang ha ka kylla step katba ka Mawlai ka dang thmu ban pynskhem ïa ka jingjop bad ïa ki lai point naduh ba sdang ka jingïalehkai.
Ka bol pashat kaba paka na u Kevin ka la pynïoh ïa ka Mawlai ban pynkhih ïa ka kol kaba nyngkong, ha kaba u Loving u la shut ïa ka bol kaba la ïaid lait ïa u rangïalehkai ba shadien na ka jingjngai kaba tang hynriew pruh.
U Franklin Surong, rangapkol jong ka Malki, u la khanglad ïa u Brolington Warlarpih ban ïoh thep kol ha ka minit kaba 26 hadien ba une u nongap kol u la lah ban kyrda (save) ïa direct free-kick kaba la jan rung. Hynrei lai tylli ki kol ki la wan tang hapoh katto katne minit ha kaba u Robert u la pynkhihjar na ka liang kadiang shuwa ba u Kevin un pashat biang sa shi sien ïa ka bol kaba thikna sha u Loving ba un ïoh thep ïa ka kol kaba ar jong u ha kane ka jingïakhun.
Tang hadien shi minit ka Mawlai ka la pynbud sa ïa ka kol kaba saw, da ka bol kaba la pashat kham jngai (long ball) kaba la ïakynduh ïa u Fairming, uba la rah ïa ka bol hapoh ka phyllaw kol (box) shuwa ban thep jlang pat ïa ka sha kol.
Watla katta, ka Mawlai kam shym la lah ban ïoh ïa ka jingjop kaba paka (clean sheet) khlem da ailad ïa ka liang pyrshah ban ïoh pynkhihjar, hadien ba u Damutlang jong ka Malki, u la lah ban mareh biang por sha ka bol bad tam ïa ki rangïalehkai ba shadien jong ka Mawlai ban pynkhih ïa ka shi kol na ka bynta ka Malki ha ki minit pynjlan shuwa ban kut ka kylla step.
Ka kylla miet ka la sdang ha kaba ka Mawlai ka la nang pynjur shakhmat, ha kaba u Kevin, uba la ïarap pynïoh ar tylli ki kol (assist), dalade hi u la ïoh ban kyntiew ïa la ka jong ka kyrteng ha ka thup ki rangïalehkai ba ïoh pynkhihjar ha kane ka sngi.
Watla katta ruh, ka Malki ka la ïoh ïa ka lad ban pynduna ïa ka kol lamkhmat hadien ba u Wallambok Dkhar ka Mawlai u la pynur (foul) ïa uwei u rangïalehkai ka Malki hapoh phyllaw kol (box) ha ka minit kaba 64. Hynrei u Niklestone Ryntathiang u la shut eh palat ïa ka bol kaba la her shaduh ka jaka shong ki nongpeitkai.
Ka jingïakhun ha kane ka sngi Ba-ar yn ïohi ïa ka Mylliem ka ban aireng ïa ka kynhun kaba bat ïa ka nam lahduh, kata ka Shillong Lajong ha ka por 4:30 janmiet. Kane kan dei ruh ka jingïalehkai kaba khatduh jong ka kylla kaba saw (Round 4).
