Shillong, Nailur 08: Ha ka jingïalang kaba long ha ka sngi Saitjaiñ (taïew ba ladep), ka Meghalaya Football Association [MFA] ka la rai ban ai jingïarap da ka song pisa ïa ki nongïalehkai na kane ka jylla kiba mihkhmat ïa ka kynhun India ha ka kyrdan ïalehkai bar ri (International Level).
ïa kane ka sienjam yn pdiang sngewbha da baroh ki nongïalehkai phutbol ka Meghalaya kiba beh ïa ka jingangnud ban mihkhmat ïa ka ri bad ban phong ïa ka jersey jong ka kynhun ïalehkai phutbol ka ri India.
Ki nongïalehkai ha ki kynhun ba la rangbah (baroh shynrang bad kynthei) kin ïoh T.50,000, katba kiba mihkhmat ïa ki kynhun U-23 jong ka India kin ïoh T.40,000. Ki nongïalehkai kiba mihkhmat ïa ka ri ha ka kyrdan junior lane sub-junior kin ïoh T.25,000.
Kumba ka paw, dang shen ka Meghalaya ka la sakhi ba katto katne ki sap ïalehkai jong ka jylla ki la shah jied ban mihkhmat ha ka kynhun ïalehkai U-17 bad U-20 jong ki kynthei ka ri India – ka Fragrancy Riwan, ka Ribansi Jamu, ka Alisha Lyngdoh bad ka Bonifilia Shullai. Ha ka jingïalehkai jong ki shynrang, u Manbhakupar Malngiang bad u Banlamkupar Rynjah ki don ha ka kynhun U-17 jong ka India ha u snem ba la dep bad u Lionel Daryl Rymmei ha ka kynhun U-20.
Haba phaidien, kiwei pat ki rangïalehkai kiba la ïoh mihkhmat ïa ka ri ki long kum u Ricky Shabong bad u Halen Nongtdu ha ka kyrdan junior, kumjuh ruh kin khlur ïalehkai kum u Eugeneson Lyngdoh, u Aiborlang Khongjee bad u Rocus Lamare ki la ïoh ban mih madan ïa ka kynhun ïalehkai kiba la rangbah jong ka ri (senior).
