Sdang ka lympung 1st Division ka EJHDFA :Jop ka Ladrymbai D- SWSC, ïakhaid kawei ka jingïakhun

Jowai, Nailur 08: Ka lympung ïalehkai phutbol ha ka kyrdan First Division Football League 2025 bala pynïaid daka East Jaiñtia Hills District Football Association (EJHDFA) kala sdang ha ka 08 tarik Nailur jong ka sngi Nyngkong, bad la pynlong ïa ka ha madan Artificial Diengshynrum, Khliehriat.
Ha kane ka sngi la wan ban plie pyrda ïaka lympung 1st Division da u kongsan ma Niyoo Sympli uba dei u Advisers ka EJHDFA, ha ka jingdonlang ki Nongkitkam bad ki Dkhot ka Association.
Haba phai sha ka jingïakhun kaba nyngkong hapdeng ka Byndihati CSC bad ka Rymbai Wahshnong SC kila poi sha ka jingïakhaid da mar shikol (1-1), ïa ka kol Byndihati CSC la thep da u Lung Hangshing haka minit ba 24, ïa ka shikol na ka Rymbai Wahshnong SC la thep da u Verdictson Swer haka minit ba 85.
Ha ka jingïakhun kaba ar ka Ladrymbai Dongwah SWSC kala jop da 3-1 kol ïa ka Rangad SC, ïa ki kol na ka Ladrymbai Dongwah SWSC la thep da u Torres Sana haka minit ba 11, u Dawanbor Lyngdoh haka minit ba 20 bad u Lekin Bareh haka minit ba 84. Ïa ka shikol na ka Rangad SC la thep da u Sharki Dkhar haka minit ba 89.
La pyntip ba ka lympung kan bteng ha kane ka sngi Ba ar (09 tarik u Nailur) da ar tylli ki jingïakhun.