Jowai, Nailur 08: Ka resol jong ki jingïalehkai phutbol bala pynïaid daka West Jaiñtia District Sports Association (WJDSA) kaba la long hynne ka sngi Nyngkong (08 tarik u Nailur, 2025) haka kyrdan ‘5th Adelbert Memorial Trophy 3rd Division Football Tournament 2025 ha madan Kiang Nangbah Stadium Dongmihsngi, Jowai.
Haba phai sha ka jingïakhun ba nyngkong haka kyrdan Third Division, la sakhi ïa ka Lumsliarsliar Mupliang kaba la pynliem noh da 2-0 kol ïa ka Y.S Welfare Pynthorlangteiñ. ïa kitei ki kol na ka Lumsliarsliar Mupliang la pynkhih da u Spain Rymbai (38’) bad u Sambha Sna (63’).
Katba haka jingïakhun kaba ar ka Youth Welfare Iooksi SC kala jop da 3-0 kol ïa ka Lion Social & Cultural SC, ïa kitei ki kol na ka Youth Welfare Iooksi SC la thep da u Pyrkhat Paslein (24’), u Wompher Tangliang (38’) bad u Sammaia Sumer (60’).
Ha ka jingïakhun kaba lai hapdeng ka Tpep-pale bad ka Saindur Mihmyntdu SC kila poi sha ka jingïakhaid khlem don kiba ïoh ban thep kol (0-0).
Katba ha ka jingïakhun kaba saw ka Mookaswan Dongnein SC kala lah ban pynliem noh da 2-1 kol ïa ka Loomiongkjam. Kine ki ar kol la thep da u Pyrkhat Shylla haka minit ba 13 bad u Lastborn Phawa haka minit ba 64. Ïa ka shi kol na ka Loomiongkjam la thep da u Emdor Lamar haka minit ba 39 jong ka kylla step.
