Shillong, Jylliew, 28: Ki nongïalam jong ki nonghikai skul Adhoc kiba don hapoh ka shatri jong ka Federation of All School Teachers of Meghalaya (FASToM) ha ka sngi Baar ki la sahmiet ha lynti ïaid kjat kaba don mar pyrshah jong ka khyrdop Main Secretariat, Shillong kum ka jingpyrshah ïa ka jingbym pynurlong jong ka Sorkar Meghalaya Democratic Alliance (MDA) ïa ki mat jingdawa.
Kane ka jingïakhih ba khlem pud sngi jong ki nonghikai skul Adhoc ka long hadien ba ka Sorkar kam shym la ïakren eiei ha ki jingïalang Kynhun Myntri kiba ladep tad haduh hynnin ka Lah Sngi U Blei wat hadien ka jingkular jong u Myntri Rangbah ka Jylla u Conrad Kongkal Sangma hakhmat jong ki nongïalam ka FASToM ha ka jingïakynduh kaba la long ha ka 12 tarik u Jymmang.
Da ka jingsngewkhia mynsiem bad da ka jingbitar ki nongïalam jong ka FASToM ha ka por noh phai sngi ki la tur sha Main Secretariat ban pynlong ka jingïashong kyllaiñ myngngor kaba khlem pud sngi bad kumjuh la pynlong ïa kane ka jingïakhih kaba jai jai hakhmat ka Mini Secretariat ha Tura.
Namar ka jingbym khot ïakren jong u Myntri Rangbah ka Jylla wat hadien ba la kut ki kynta wai trei jong ki ophis Sorkar, ki nonghikai ki la rai ban sahmiet ha kane ka jaka tad haduh ba ka Sorkar kan da pynbna ba la pynurlong ïa ki mat jingdawa.
Ka FASToM ka la phah ïa ka jingtyrwa sha ka tnat Pule Puthi jong ka Sorkar Jylla ban kyntiew ïa ka jingsiew tulop kaba T.18 hajar ïa ki nonghikai skul Adhoc naduh Lower Primary haduh Higher Secondary bad nalor kaba pynkiew ïa ka jingsiew tulop kaba 5 percent manla u snem.
Ka jingïalang ba kyrkieh jong ka Central Executive Committee ka FASToM, ka la rai ban ym leit satia sha skul, kata naduh ki nonghikai kiba hikai ha ki Lower Primary haduh Higher Secondary bad kynthup ruh ki nonghikai sobjek Hindi bad ki Fourth Teachers.
“Ngi la rai ban sah miet beit hangne tad haduh ba ka Sorkar kan da sngap ïa ki jingdawa bad lada kam sngap ruh kam leilei. Kata ka dei ka jingkut jingmut jong ngi,” ong u Nongaitkien ka FASToM u Bah Mayborn Lyngdoh ha ka jingïakren bad ki lad pathai khubor.
“Ka jingbym kular jong kane ka Sorkar na ka daw ba na ka tnat Pule Puthi ym don jingmih eiei hynrei ka don tang ka jinglut,” u la ong.
Haba ïathuh ïa ka jingkular jong u Myntri Rangbah ha ka jingïakynduh ha ka 12 tarik Jymmang, une u nongïalam ka FASToM u la ong, “ngim lah ban ong ba ha ka jingshisha u (Conrad Sangma) kular kai ha kato ka sngi namarba wat u Addl. Chief Secretary u Bah DP Wahlang uba ngi shahniah bha ruh u la kular. Hadien ba ngi la ïohi ïa kata ka jingkular jong ki kam shym la seisoh eiei mynta ngi lah ban ong ba ki la shu kular kai ïa ngi.”
U la ïathuh ba ka FASToM ka ladep phah ïa ka jingthoh pynkynmaw ha ka 12 tarik mynta u bnai ba lada ka Sorkar kam sngap ka seng kam banse ban pynlong biang sa shisien ïa ki jingkhih khnang ban pynsngew ïa ki jingdawa sha ka Sorkar kaba kyllut.
