Bynshet biang ka MEPA ha u Bah RM Shabong kum u President, Bah John Thabah kum u Genl. Secy

Shillong, Nailur 07 : Ka General Meeting jong ka Meghalaya Editors’ and Publishers’ Association (MEPA) kaba long ha kane ka sngi Saitjain, ka 06tarik mynta u bnai ka la jied ïa ki nongkitkam kiba thymmai na ka bynta ka samoi treikam kaba lai snem.
Ka jingïalang ha kane ka sngi ka la jied biang ïa u Bah R Monarch Shabong kum u President ka MEPA kumjuh ruh u Bah John W Thabah pat u la shah jied biang kum u General Secretary jong ka.
Ki Vice President kiba shah jied ha kane ka jingïalang ki kynthup ïa Dr. Kamal K. Jhunjhunwala, Rajib Choudhuri, Markus M. Thaïang, Raphael Warjri bad Bah Russel Nongrum.
Ha kajuh ka por ki Joint Secretary ba thymmai ki kynthup ïa u Bah John Lyngdoh bad ka Purbasha Bhattacharjee nangta ïa u Bah Kyrmen Uriah pat la jied biang kum u Organising Secretary. La jied ruh ïa i Kong Deimebanda Blah ban peit ïa ka platyngka jong ka MEPA.
La jied ruh ïa ki hynñiew ngut ki Executive Member ha kane ka jingïalang bad kine ki kynthup ïa u Bah Justice Marweiñ, EM Jose, Apporlet Shabong, Starfing Pdahkasiej, Bah Deimaïa Siangshai, Bah Sunday Sumer, Bah Dominic Savio Diengdoh bad Bah Banker Lapang.
Ka jingïalang ha kane ka sngi ka la ïatai bad ïakren ruh halor kiba bun ki ishu kiba ïadei bad ki shlem treikam jong ki lad pathai khubor bad kumjuh kaba ïadei bad ka bit ka biang jong ki nongtrei ha ki lad pathai khubor.
Ha ka kylla kaba ar jong katei ka jingkynduh lang la wan ban donlang ruh da ka Myntri ka tnad Information and Public Relations, Dr. M Ampareen Lyngdoh ryngkat u Commissioner & Secretary ka tnad IPR, u Vijay Kumar Mantri, nangta u Director ka tnad Information and Public Relations, Bah Batlang Sohliya, kiwei ki ophisar na ka tnad IPR bad kumjuh ki nongthoh khubor.