Shillong, nailur 07: Watla ka Nongrim Hills ka la ïoh ban lamkhmat arsien ïa ka jingïalehkai hynrei ka la hap ban hun noh da ka jingïakhaid da mar 2-2 kol ha ka jingïakhun kaba pynbyrngia bha pyrshah ïa ka Laitkor ha ka Shillong Premier League 2025 ha madan First Ground-SSA Stadium, Polo, ha ka sngi Saitjaiñ.
Na ka bynta ka Nongrim Hills ki ar tylli ki kol la thep da u Banshemphang Kurbah (36’) bad u Isharwell Mukhim (49’), katba u Shanborlang Nongrum (45’) bad u Sandy Kharkongor (90’+2) ki la pynkhih mar kawei ban pynïakhaid na ka bynta ka Laitkor.
Na ka bynta ka Nongrim Hills kane ka dei ka point kaba nyngkong eh jong ki ha kaei kaba la long ka jingsdang kaba suki na kano kano ka kynhun ïa ka SPL 2025. Ha kawei pat ka liang, ka Laitkor kan kmen ba ka la lah ban pynïakhaid wat hadien ba shah lamkhmat arsien hynrei kan jin da la sngewtynnad shibun eh lada ka jop; kane ka dei ka sien kaba ar ba ki la hap poiñ bad ki kynhun kiba kham hapoh ha ka thup kyrdan hadien ba ki la shah rem noh da 1-0 ha ka Malki ha ka jingïalehkai ba nyngkong jong ka samoi ïalehkai jong ki.
Ha kane ka janmiet u rangapkol jong ka Laitkor, u Deranius Wahlang u la ïoh ban kyrda katto katne ki jingpyrshang kiba thikna na ka liang pyrshah da ka jingtbit jong u ban khanglad ha kaba sdang hynrei um shym la lah ban leh eiei halor ka bol kaba khlaiñ ba la pyrshang da u Banshemphang kaba la pynlong ïa ka Nongrim Hills ban tam shakhmat.
Hynrei ka Laitkor ka la lah ban pynïakhaid shuwa ban kut ka jingïalehkai ha ka kylla step. Ha ka jingpyrshang ban thaw eiei na ka corner kick, la ïoh ban sakhi ha ka sien ba nyngkong ba ki la lah ban buh jingma ïa ki rangapdien jong ka Nongrim Hills. Hadien nangta ka bol ka la wan sha u Shanborlang bad u la shut da kaba tyngeh ïa ka bol da ka kjat kadiang kaba la ïaid lait ïa u nongap kol jong ka Nongrim Hills u Ebenson Warbah.
Ka Nongrim Hills ka la ïoh ban lamkhmat biang mar mar hadien ba la sdang ïa ka jingïakhun ha ka kylla miet, da ka bol pashat na ka liang kadiang kaba la shem ïa u Isharwell, uba la mareh shakhmat ban poi sha ka bol bad ban thep siak ïa ka bol shapoh kol.
U Banshemphang u la jan ïoh ban thep ïa ka kol kaba ar ha ka minit kaba 55 hynrei ka free-kick jong u ka la shu pynsmiej ïa u dieng kol.
Katba ki minit ki la nangjan ban poi sha kaba kut, ka Nongrim Hills ka la sdang ban ïalehkai da kaba pyrkhing khnang ban khur ïa ka jingjop kaba la donkam bha hynrei ka jingtrei shitom jong ki kam shym la long kaba seisoh hadien ba u Sandy uba la mih madan kum u nongbujli (substitute) u la pynkhih ïa ka kol ban pynïakhaid ha ki minit pynjlan ïa ka por shuwa ban kut. U la hap ban ïaknieh bad u Onyxson Buhroy ban ïoh ïa ka bol, ha kaba u la lah ban jop, wat la baroh arngut ki la kyllon sha madan, hynrei u la ïeng joit pynstet bad u la pyrshang da kaba kham jam na jngai kaba u Ebenson um lah ban leh eiei.
Da kane ka jingïakhaid, ka Nongrim Hills ka dang ïai bteng ban sah ha trai duh da 1 poiñ na ki saw tylli ki jingïakhun katba ka Laitkor ka kiew sha ka kyrdan kaba hynriew da ka 4 poiñ – ka ïaryngkat bad ka Mylliem bad ka don ïa ka jingïapher kol kaba kham tlot (-1 haduh +1) hynrei ka don ïa ka resol ïakhun kaba kham bha hapdeng jong ki (head-to-head), kaba kheiñ nyngkong ha ki lympung ïalehkai jong ka SSA. Hynrei ka Mylliem ka dang don kawei ka jingïalehkai ha kti.
Ka jingïalehkai SPL 2025 ha kane ka sngi Nyngkong kan long hapdeng ka Mawlai pyrshah ïa ka Malki ha ka por 4 shiteng janmiet.
