Yn peitngor ka sorkar ban pyntikna ïa ka shong suk shong shngaiñ ha ka jylla, ong ka Myntri

Shillong, Nailur 06 : Ka Myntri Sorkar ka Jylla, ka Kong Ampareen Lyngdoh ha ka sngi Saitjain ka la ong ba ka sorkar kan sa peitngor ïa ki polisi jong ka sorkar haba ïadei bad ki bor pahara khnang ban pyntikna ïa ka shongsuk shongshngaiñ hadien ba ki bor pulit ki la ïoh ban kem noh ïa ka kynhun kiba ak kum ki bor pahara nalor ka jingïoh kurup ïa ki airgun ha syndah ka Secretariat.
“Namar kane ka jingjïa, kum ka sorkar hi ngin hap ban leh ei ei ban peitngor ïa kine baroh mardor,” ong ka Myntri haba kren bad ki lad pathai khubor hadien ba la wai ka prokram.
Da kaba pynpaw ba ka long kaba donkam ban pynkut noh ïa ka jingak baheh ki riewshimet ka Myntri ka la ong ruh ba ka sorkar kam dei satia ban ailad ïa ki bor pahara thok bad ruh ban pyntikna ba ki paidbah kim dei ban shah ïalam bakla.
Ha kajuh ka por ka Myntri kala ai ka jingïaroh ïa ka tnad pulit kiba la shimkhia mardor ban pynpaw pyrthei noh ïa katei ka kam. “Ki pulit ki la leh ïa kaba dei eh ban pynpaw pyrthei ïa kane ka kam baroh,” ka la ong da kaba bynrap ba u Symbud Myntri Rangbah ba peit ïa ka tnad Kampohiing ka Jylla un sa ai ka jingpyntip hadien ba la ïoh ïa ka kaiphod halor kane ka jingjia.
Lah ban kdew hangne ba ki pulit ka East Khasi Hills ha ka janmiet sngi Thohdieng ki la ïoh kem ïa uwei u rangbah ba la tip kyrteng kum u Bah Mebanshem Snaitang, 25 snem, uba sah ha Pohkseh, Shillong ba la synran lang da ki briew kiba riam jaiñ ïong kum ki nongpahara hajan ka Main Secretariat, Shillong.
Ki jingkem jong ki Pulit ïa u Bah Mebanshan Snaitang ka long hadien ba ki lap ïa ki lai tylli ki kali tah ïit ïong kiba pynïeng hajan ka Shopper’s Stop, IGP ha ka por kumba 2:30 baje noh phai sngi.
Ki pulit ki ïathuh ruh ba ki lai tylli ki kali ki long kawei ka kali Audi A4 (rong saw) bym pat don ïa u registration number, kawei ka kali Scorpio N (rong ïong) kaba don ïa u nombar ML05-0309 bad kawei ka kali Toyota Innova (rong ïong) kaba don ïa u registration number T0922ML7411A.
U Superintendent of Police ka East Khasi Hills Bah Vivek Syiem ha ka jingïakren bad ki lad pathai khubor ha katei ka janmiet u la ïathuh ba ïa u Bah Meban Snaitang la rah noh da ki Pulit sha Sadar Police Station ban pynlong ïa ka jingtohkit
Ha ka jingkhynra ïa kine ki lai tylli kali la lap ba kawei napdeng jong ki, la pyndait ïa ka Siren bad baroh lai tylli ki kali ki dei kiba la long trai da u Bah Mebanshem Snaitang.
Shuh shuh u SP u la ïathuh ba ka jinglap ïa ki Air Gun na ka kali Scorpio ka la pynsuba ïa ki Pulit ba kine ki briew ki lah ban pyndonkam ha kaba pyntieng pynsmiej ïa ki paidbah.