Ka Good Samaritan cum Counselling Centre ha Khlieh Ïewduh kan long ka jingmyntoi ïa ki paidbah

Shillong, Nailur 06: U Myntri ka tnat Social Welfare u Bah Paul Lyngdoh ha ka sngi saitjaiñ u la plie ïa ka Good Samaritan cum Counselling Centre ha Khlieh Ïewduh bad u la ong ruh ba kane ka centre ka dei ka jingsdang jong ka tnat ban ai ki lad jingkyrshan bad ki jingïalam lynti na ka bynta ki briew kiba mad ïa ki jingeh ha kaba ïadei bad ki jingdih buaid kum u drok bad kiwei kiwei.
Haba kren ha kane ka sngi na ka liang jong u Bah Lyngdoh u la ong ba kane ka centre kan ai ka jingshakri na ka bynta ki samla ha Ïewduh, kiba la shah ktah bha ïa ka jingpyndonkam bakla ïa u drok.
Katkum ka jingong jong u, u la batai ba ka tnat ka la ïoh ki jingkyrshan bad ki jingïatreilang na ki nongïasyllok kiba la tbit ha kaba ïadei bad kane ka bynta.
U Bah Lyngdoh u la pyntip ba ka sorkar ka ïarap ha kaba ïadei bad ka jingai wai na ka bynta ka centre, bad kumjuh ruh na ka bynta kiba ai ki lad jingïarap ban pynïaid ïa kane ka jaka. U la pynbna ruh ba ki counsellor kin ïoh ki lad jingïarap na ka sorkar ha kaba ïadei bad kane ka jingai jingshakri jong ki halor kane ka kam.
U Myntri u la pynpaw ruh ba ka sorkar ka don ka jingangnud ban buh kham bun ki counselling centre kiba shong ruh katkum ki jingdawa jong ka por ki ban long kum ki lad ai jingïarap ïa ki paidbah kiba bun.