New Delhi, Nailur 06: Ka kynhun ki rangïalehkai phutbol ba la rangbah jong ka India kan ïatynjuh bor pyrshah ïa ka Oman ha ka jingïalehkai playoff jong ka kyrdan kaba lai (third-place playoff) jong ka lympung ‘CAFA Nations Cup 2025’ ha Hisor Central Stadium ha Tajikistan ha ka sngi Nyngkong.
Ka Oman ka la pyndep ha ka kyrdan ba-ar ha ka Group A hadien ka Uzbekistan kaba la wan ha khlieh duh ha ka sngi Thohdieng watla ka la ïoh mar katjuh ka poiñ. Kumta kin thmu ban pynkut noh ïa ka jingïalehkai jong ki ha ka rukom kaba paka da kaba pynneh ïa ka jingïalehkai kaba khlem shah rem ha kane ka lympung. Katba ha kawei pat ka liang, ka Uzbekistan kan ïakhun ïa ka phainal pyrshah ïa ka Iran kaba wan hakhlieh duh ha ka Group B.’
Ka India ka la pynskhem ïa ka jaka jong ka ban ïakhun ïa ka kyrdan kaba lai hadien ba ka la ïakhaid khlem thep kol pyrshah ïa ka Afghanistan ha ka jingïalehkai ba khatduh jong ka Group B ha ka sngi Palei. La pynthikna ïa ka jingïoh rung jong ki tad hadien ba ka Iran bad ka Tajikistan ki la ïakhaid da mar 2-2 kol.
Ka kynhun jong u Khalid Jamil ka la pynkut ïa ka jingïalehkai group stage da kaba kamai saw poiñ na ki lai tylli ki jingïakhun, hadien ba ka la ïoh ban jop, ïakhaid bad rem mar shi sien. Ka Iran ka la wan ha ka kyrdan ba nyngkong da kaba kamai hynñiew poiñ, katba ka Tajikistan ruh ka la ïoh ban khur saw poiñ hynrei ka la shah tam noh ha ka India katkum ka resol jong ka jingïakhun hapdeng jong ki (head-to-head rule), ha kaba ka India ka la jop da 2-1 ha ka jingïalehkai ba nyngkong ïa ka Tajikistan. Ka Afghanistan, kaba tang shi poiñ, ka la khyllem noh na kane ka lympung khlem da jop.
Na ka bynta ki rangïalehkai jong u Jamil, ka jingïakhun ha ka playoff ka ailad ban ïa ki ban ïoh kiew rynsan katba ka Oman kan thrang ban pynneh ïa ka jingïalehkai kaba khlem shah rem bad ban pynkut noh ïa ka lympung da ka jingïakhun kaba khlaiñ.
Ha ka sngi Thohdieng, ka All India Football Federation (AIFF) bad ka FC Goa ki la pynbna lang ba u rangïalehkai ba shadien ka India u Sandesh Jhingan u la mynsaw ha ki bynta jong ka ngab shyntur ha ka por ba ïakhun pyrshah ïa ka Iran ha ka CAFA Nations Cup 2025.
U Jhingan u la mad ïa kane ka jingmynsaw ha ka kylla step jong ka jingïalehkai pyrshah ïa ka Iran, ha kaba ka India, ka la shah rem da 0-3 kol hynrei u la bteng beit ha madan bad ïalehkai baroh 90 minit, ha kaba sa shisien u la pynshisha ba u dei u rangïalehkai ba shisha na ka bynta ka ri India. Hadien kata, u la shah weng noh na ki jingïalehkai ba dang sah jong ka CAFA Cup bad u la wanphai biang sha India ha ka sngi Balang.
