SHILLONG, Nailur 04: Ka Meghalaya Swimming Association [MSA] ka la pynbna ba kan pynlong ïa ka lympung ïakop jngi kaba la tip da ka ‘1st Master (Age Group) Swimming’ ha ka 01 tarik Risaw 2025 ha Crinoline Swimming Pool, Shillong.
Katkum ka jingpynbna kane ka lympung ïalehkai kan kynthup lang ïa baroh ki shynrang bad kynthei kiba la san, ha kaba kin ïashim bynta ha la ki jong ki jong ki kyrdan ba la phiah katkum ka rta jong ki nongïalehkai.
Ki kyrdan katkum ka rta jong ki nongïalehkai (Age Groups Category) ki long: 25-29, 30-34, 35-39, 40-44, 45-49, 50-54, 55-59, 60-64, 65-69, 70-74,75-79 bad 80 snem shaneng.
Ki jingïakop (Event) ha kane ka lympung ki don haduh saw tylli, bad kine ki kynthup ïa ka Free Style 50,100m, Back Stroke 50m, Breast Stroke 50,100m bad ka Butterfly Stroke 50m. La shah tang 3 tylli ki jait jingïalehkai na ka bynta uwei pa uwei u nongïashim bynta.
Kumta na ka liang jong ka MSA ka la pyntip ba ka jingpynrung kyrteng kan plie naduh ka 04 tarik Nailur, 2025 (hynnin ka sngi Palei). Ka por ba khatduh ban pyndep ïa ka jingpynrung kyrteng kan long ha ka 24 tarik Nailur, 2025, bad yn nym pdiang ïa kiba pyndep hadien ka tarik ba la buh.
Yn pdiang ïa ka jingpynrung kyrteng lyngba ka online mode tang da kaba pyndonkam ïa kane ka link ba la ai, ‘https://forms.gle/m8zgtd7kxxg28bnr9’. Na ka bynta ki jingtip ba kham bñiah phi lah ban phun ha kine ki number – 9862571179, 9402195891, 9436105362, 9436102104, 9862011211, 9774074974, 7005251678.
Kane ka long katkum ka kyrwoh na u General Secretary jong ka Meghalaya Swimming Association, Bah Baika R. Lyngdoh, ha kaba ïadei bad ka jingthmu jong ka synjuk ban pynlong ïa kane ka lympung ha u bnai Risaw.
