Shillong, Nailur 04: Ka Laban Sports Club Table Tennis Academy, hynne ka sngi Palei (04 tarik Nailur, 2025) ka la ïoh ban sdang ïa ka lympung ïalehkai Table Tennis hapdeng ki skul kaba la tip da ka ‘2nd Inter School Table Tennis Championship 2025’.
ïa kane ka lympung kaba ar sngi lynter la pynlong ha Laban Sports Club Indoor Sports Hall, bad la pynïaid da ka LSCTTA, Shillong ha ryngkat ka jingïatreilang bad ka Directorate of School Education & Literacy (DSEL) jong ka sorkar Jylla.
Ha kane ka sienjam kaba ar ki don haduh 11 tylli ki skul kiba la wan shim bynta, kine ki long naduh ka All Saints Diocesan Higher Secondary School, St. Edmunds School, B.K. Bajoria School, Risa Higher Secondary School, St. Anthonys School, BDW International School, KV EAC Upper Shillong, Army Public School, Pine Mount School, Loreto Convent School bad ka Grace Academy.
Ha kane ka lympung la phiah ar tylli ki kyrdan, ba kynthup ïa ka U-17 bad ka U-12 kynthei bad shynrang, katba ki jingïakhun la phiah ha ka kyrdan ïakhun kynhun bad shimet (Team & Individual event). Haba kheiñ kyllum, ki jingiakhun baroh ki long haduh 64 tylli, 16 tylli ha ka kyrdan U-12 Boy’s, 7 tylli ki U-12 Girls, 30 tylli ha ka U-17 Boy’s bad 11 tylli ha ka U-17 Girls.
La wan plie pyrda ïa kane ka lympung ha ka sngi sdang da ka Principal jong ka Pine Mount School, ka Kong Banri Umdor Nongbri kum ka kongsan ha ka jingïadon lang u Bah Ios Sun Chairman jong ka Riat Laban Dorbar Pyllun, kum u symbud kongsan.
