Mawkyrwat, Nailur 04: Ka Sawsymper United Sports Club ka la long ka nongjop hadien ba ka la lah ban pynliem noh pyrshah ïa ka Shiparalok Football Club da 5 – 4 kol lyngba ka Tie Breaker ha ka lympung ïalehkai kynjatbol phainal ba la tip kum ka VII Open Knockout Football Tournament 2025 ba la pynïaid da ka Federation of Khasi Jaiñtia & Garo People’s (FKJGP) Sawsymper Circle ha madan jong ka St. Ferrando Higher Secondary School Sawsymper, East Khasi Hills District.
Lah ban kdew ba kane ka lympung ïalehkai kynjatbol ka long kum shibynta ban pynmih pisa na ka bynta ban ïarap ïa ki khun-swet khun-rangli kiba duna ha ka ïoh ka kot kiba hapoh ka dong ka thaiñ Sawsymper bad kumjuh ruh ban pynmih pisa ban thied ïa ka kali kit nongpang ne ambulance.
Haba phai pat hapdeng ka jingïalehkai hapdeng ka Sawsymper United Sports Club bad ka Shiparalok Football Club ka la long shisha kaba itynnad namar ka jingtbit ki ‘rangïalehkai ha kaba ka thong jong ki ka long ban rah ïa ka nam jop.
Namarkata, hapdeng jong ka jingïakhun hapdeng kitei ki ar kynhun ha ka kyllastep kim shym la lah ban ïa pynkhih jar wat kawei ruh hynrei haba wan phai biang ha ka jingïalehkai jong ka kyllamiet baroh ar ki la ïa khaid mar kawei kata ka Sawsymper United Sports Club na u Shano Tariang ha ka minit kaba 47 bad ka Shiparalok Football Club na u Deibor Tongper ha ka minit kaba 89.
Bad ban rai ïa ka kynhun kaba jop na ka liang ki nongpynïaid ki la pynïaleh noh da ka Tie Breaker ha kaba ka Sawsymper United Sports Club ka la jop da 5 – 4 kol pyrshah ïa ka Shiparalok Football Club.
Ha kaba kut jong ka jingïalehkai la ïoh ban sam ïa ki khusnam sha baroh ar tylli ki kynhun kata kaba jop ka la ïoh khur 2 lak tyngka ryngkat ka khusnam bad kaba shah jop ka khur 1 lak tyngka bad ka khusnam, nangta la sam ruh ïa ki khusnam shimet kaba dei ha ka bynta jong u ‘rangïalehkai ba kynsai la ïoh da u Shano Tariang, ïa ka nam u ‘rangïalehkai ba tbit ha ka lympung la ïoh da u Skhem Mawlong, ïa ka nam nongthep bun kol la ïoh da u Lam Lamare ha kaba kine ki dei na ka Sawsymper United Sports Club bad ka nam nongapkol ba tbit ka leit sha u Shlurbor Kharshilot jong ka Shiparalok Football Club.
U kongsan ha kane ka lympung ïalehkai kynjatbol phainal u dei u bah Ollan Sing Suin uba dei u MLA ka 25 – Mawsynram Constituency bad u bah Dundee Cliff Khongsit, President ka FKJGP Central Body kum u symbud kongsan, ha ryngkat ka jingïadonlang ki nongkitkam jong ka Federation of Khasi Jaiñtia & Garo People’s (FKJGP) Sawsymper Circle, ki rangbah shnong lem bad ki paidbah nongwan peit-kai kiba la poi da ki hajar ngut.
