SHILLONG, Nailur 04: Baroh ar tylli ki jingïalehkai jong ka lympung Shillong Sports Association Second Division Football league 2025 kiba la long hynne ka sngi Palei ha madan First Ground-SSA Stadium, Polo, ki la kut ha ka jingïakhaid.
Ka jingïalehkai kaba nyngkong hapdeng ka Nongmensong SC bad ka Umphyrnai SC ka la ïakhaid da mar 1-1 kol, kumjuh ruh ka Smit SC bad ka Marbisu SC ki la ïasam mar shi point naba ïakhaid da mar 1-1 kol.
Haba phai sha ka jingïalehkai kaba nyngkong jong kane ka sngi, ka Umphyrnai ka la ïoh ban lamkhmat nyngkong lyngba ka kol jong u Sharai Rainia (27’min) hynrei ka Nongmensong ka la pynïakhaid noh lyngba u Kevin Diengdoh (71’min).
Haba phai sha ka jingïakhun kaba bud, hadien ba ym shym la don ba thep ha ka kylla step u Donboklang Synrem u la buh hakhmat ïa ka Marbisu da kaba pynkhih ïa ka jar ha ka minit kaba 70, hynrei tang hadien 5 minit u Pynkhlain Nongrum u la jubab da kaba pynïakhaid na ka bynta ka Smit.
Ha kane ka sngi Thohdieng kin don ar tylli ki jingïalehkai SSA 2nd Division Football League 2025. Kaba nyngkong ha ka por 11:15 baje mynstep ka Sohryngkham SC kan ïakhun pyrshah ïa ka Mawryngkneng SC, nangta kaba ar ha ka por 1:45 baje mynsngi hapdeng ka Sohiong SC bad ka PFR FA.
